"აი, ნახავთ, ხვალიდანა უკან წავლენ, მე რომ აქ ამოვედი ვუთხარი უკვე და წავლენ უკანა", — ასე, ხუმრობით უპასუხა გორის მაჟორიტარმა დეპუტატმა, იოსებ მაკრახიძემ ჟურნალისტების კითხვებს გუგუტიანთკარში განვითარებულ მოვლენებზე.

მას ჰკითხეს, თუ რატომ არ ჩადიოდა გორის მერი სოფელში, რაზეც პასუხად იხუმრა: "თუ მერის ამოსვლა, რუსებსა ცხინვალამდის გადაიყვანდა, უფრო ადრე უნდა ამოსულიყო". ზემოთხსენებული პასუხი კი ამის შემდეგ გასცა, როცა ჰკითხეს, თუ რას ცვლიდა მისი ასვლა სოფელში.

გარდა ამისა, მაკრახიძე ფიქრობს, რომ გორის მერმა არ იცის რა ხდება გუგუტიანთკარში, თორემ აქამდე ჩავიდოდა სოფელში. თავად მერმა, კონსტანტინე თავზარაშვილმა კი On.ge-სთან საუბრისას აღნიშნა, რომ შვებულებაშია და გუგუტიანთკარში დასვენების დასრულების შემდეგ ჩავა. მის ამ განცხადებას ადგილობრივები გამოეხმაურენ. "ნორმალურია ეგა?... დასვენების დრო არის ამ უბედურობაშია?", — განაცხადა ერთ-ერთმა.

გუგუტიანთკარში უკანონო ბორდერიზაციის პროცესი აგვისტოს ომის მე-11 წლისთავზე, 7 აგვისტოს დაიწყო და რამდენიმე დღეში შეწყდა.15 აგვისტოს საოკუპაციო რეჟიმმა მუშაობა განახლა.

რუსი სამხედროები ძელებს არჭობენ საქართველოს მოქალაქეების, რაზმაძეებისა და გუგუტიშვილების ნაკვეთებში. ე.წ. საზღვარს მიღმა ექცევა მათი საცხოვრებელი სახლი, ყანები და წყლის რეზერვუარი. საოკუპაციო რეჟიმმა სამი დღე მისცა ადგილობრივებს, სახლების დასაცლელად. რაზმაძეების ოჯახი სახლს მთლიანად შლის და საშენი მასალა გამოაქვ.

მომხდარს უკვე გამოეხმაურა საერთაშორისო თანამეგობრობა და რუსეთს უკანონო ქმედებების შეწყვეტისკენ მოუწოდა. გუგუტიანთკარში იმყოფებდონენ საქართველოში აკრედიტებული დიპლომატიური კორპუსის წარმომადგენლებიც და ადგილზე გაეცნენ ვითარებას.