4 ოქტომბერს ენმ-ს წევრის, გივი თარგამაძის მანქანის აფეთქების ფაქტზე დაწყებული გამოძიების მუხლის გადაკვალიფიცირებას ითხოვს ნაციონალური მოძრობა, რადგან მომხდარს ტერაქტად აფასებს. საკითხს გამოეხმაურა იუსტიციის მინისტრი, თეა წულუკიანი:

"გამოძიება სულ 2 დღეა რაც დაიწყო. აქიდან გამომდინარე, თუ კვალიფიკაცია იქნა შესაცვლელი, შეიცვლება, თუ არ იქნა შესაცვლელი, არ შეიცვლება. დღეს ძნელია და ძალიან ადრეა ვისაუბროთ რაიმე ტიპის ვერსიებზე, თუ რა არის სინამდვილეში მომხდარი. ამიტომაც, ნუ ვიჩქარებთ, გამოძიების შედეგებს დაველოდოთ და თუ კვალიფიკაცია შესაცვლელი იქნება, მას შესაბამისი ორგანო შეცვლის".

4 ოქტომბერს, თბილისში, კოლმეურნეობის მოედნის მიმდებარე ტერიტორიაზე ნაციონალური მოძრაობის წევრის, გივი თარგამაძის მანქანა აფეთქდა. დაზიანდა მიმდებარე შენობები, ასევე ახლომდებარე ავტომობილები, დაშავდნენ გამვლელები. ჯანდაცვის მინისტრის ინფორმაციით, მანქანის აფეთქებისას დაშავებულთა რიცხვი ხუთია. მათგან ერთ-ერთს საავადმყოფოში ოპერაცია ჩაუტარდა.

შსს-მ გამოძიება დამამძიმებელ გარემოებაში, განზრახ მკვლელობის მცდელობის მუხლით დაიწყო.

გივი თარგამაძე დარწმუნებულია, რომ მისი ავტომობილი მართვადი ასაფეთქებლით ააფეთქეს და პასუხისმგებლობას ხელისუფლებას აკისრებს.