ნაციონალური მოძრაობის წევრი გივი თარგამაძე მედიასთან საუბრისას თავისი მანქანის აფეთქეის დეტალებს იხსენებს. მისი თქმით, აფეთქების მომენტში მისი ავტომობილი მოძრაობდა:

"ჩამოვედით ოფისიდან, ჩავჯექით მანქანაში, ჩემი მძღოლი მართავდა საჭეს, უნდა აგვეხვია რუსთაველზე, ამოვუხვიეთ კოლმეურნეობის მოედანზე და ამ დროს მოხდა ეს ამბავი. თავიდან ვერ მივხვდი და უფრო მეგონა, რომ წინიდან გვესროლეს. როდესაც გადმოვედით და გონს მოვედით, თქვენც ხედავთ, რომ მანქანას მთელი უკანა ნაწილი მოგლეჯილი აქვს ამიტომ დარწმუნებული ვარ, ასაფეთქებელი უკანა ნაწილში იყო აკრული და მანქანა უკან მოგვყვებოდა, საიდანაც დისტანციურად ააფეთქეს. დიდი იმედი მაქვს, რომ სხვა ადამიანების სიცოცხლეს საფრთხე არ დაემუქრება. მინდა მივმართო და ვთხოვო პოლიციელებს, ჩვენ ვართ მათი გულშემატკივრები, ვთხოვ მათ, გამოიჩინონ კეთილსინდისიერება. ისინი დაჟინებით მეკითხებოდნენ გაზზეა თუ არა ჩემი მანქანა. ჩემი მანქანა გაზზე არ არის".

თარგამაძემ ჟურნალისტებთან საუბრისას მწუხარება გამოთქვა იმ ადამიანების გამო, რომლებიც დაშავდნენ. დეპუტატი მოუწოდებს სამართალდამცავებს, სამართლიანად გამოიძიონ აღნიშნული ფაქტი და არ გაავრცელონ ხელისუფლების სასარგებლო ვერსია.

შემთხვევა თბილისში, კოლმეურნეობის მოედანზე, დღეს საღამოს მოხდა. დაზიანებულია მიმდებარე შენობები, ასევე ახლომდებარე ავტომობილები. არსებული ინფორმაციით, 3 ადამიანია დაშავებული.