"მე თუ მოვედი აქ, ღმერთის წყალობით, უზენაესი სასამართლოს მოსამართლე გავხდები კიდეც", — ამბობს უზენაესი სასამართლოს მოსამართლეობის კანდიდატი და მოქმედი ადვოკატი პაატა შავაძე, რომელსაც საბჭოში დღეს, 12 აგვისტოს გაესაუბრნენ. პაატა შავაძე საბჭოს არამოსამართლე წევრის, ნაზი ჯანეზაშვილის კითხვის პასუხად აცხადებს, რომ სისტემაში კლანურობის შეგრძნება არ არსებობს და კლანი დღეს საქართველოში არ არის.

კანდიდატი გასაუბრებისას საბჭოს იმ წევრებსა და მოსამართლეებს აქებდა, რომლებსაც ოპოზიცია და არასამთავრობოების ნაწილი "კლანად" მოიხსენიებს. პაატა შავაძის თქმით, სწორედ "ამ ადამიანების მარჯვენით" გაკეთდა ყველაფერი სასამართლო სისტემაში.

"ის, რა რეფორმებიც ხორციელდება, დიმიტრი გვრიტიშვილის, გიორგი მიქაუტაძის დამსახურებაა. ყველასი, აქ ვინც ზის პატივცემულები, ყველას დამსახურებაა. ბატონი ირაკლი შენგელიასი, ბატონი რევაზ ნადარაიასი... მე, პირადად, როგორც ერთი რიგითი იურისტი, ვემადლიერები ამ ადამიანებს... ჩემი ნათესავი არც ერთი არ არის, ნეტა, იყვნენ, მივესალმებოდი ამას. აი, მაგალითად, ბატონი დიმიტრი [გვრიტიშვილი], მე ყოველთვის მოხარული ვიყავი, როდესაც მასთან მიწევდა პროცესები. ყველგან მითქვამს, რომ არაერთი დარღვეული უფლება იქნა აღდგენილი...

რაც შეეხება მიხეილ ჩინჩალაძეს, ის არის უძლიერესი იურისტი ჩვენს სინამდვილეში, ის არის ძალიან ძლიერი მენეჯერი და შესაბამისად, მას ხელეწიფება რეალური რეფორმების განხორციელება ამ ღირსეულ გუნდთან ერთად... მაგალითად, თბილისის საქალაქო სასამართლოში, სამოქალაქო საქმეთა კოლეგია როგორც მუშაობს, ბრწყინვალედ, ვადები დაცულია, დროულად იწყება პროცესები, სამოქალაქო საქმეთა კოლეგიის ხელმძღვანელი რომ არ ვარგოდეს, ეს ასე არ იქნება, არა? ოჯახის თავი და უფროსი როგორიც არის, ისე არის ყველაფერი მიმდინარე... ხო, [სერგო] მეთოფიშვილს ვგულისხმობ, ძალიან დიდ პატივს ვცემ, ძალიან მომწონს. ეს არის ჩემი შეფასება, იმედია, გემოვნებაზე არ ვიდავებთ", — ამბობს უზენაესი სასამართლოს მოსამართლეობის კანდიდატი, პაატა შავაძე.

პაატა შავაძემ ნაზი ჯანეზიშვილს მიმართა, რომ უკეთესი იქნებოდა მისგან "მეტი პოზიტივი" წამოსულიყო, რადგან საბჭოს წევრია და მისი აზრით, სწორედ ამიტომ, მხარს უნდა უჭერდეს სასამართლო ხელისუფლებას:

"მე გამიხარდებოდა, რომ ქალბატონი ნაზი ჯანეზაშვილი ფეისბუქში გამოვიდეს და თქვას, დღეს ეს დადებითი ძვრები განხორციელდა იმიტომ, რომ მუდამ ვითრგუნებით ადამიანები, როდესაც სულ უარყოფითს ვხედავთ".