საქართველოს პრეზიდენტი სალომე ზურაბიშვილი აგვისტოს ომის მე-11 წლისთავთან დაკავშირებით მიმართვას ავრცელებს. იგი არსებული კონფლიქტების მშვიდობიანი გზით გადაწყვეტისთვის "საზოგადოებრივი ერთობის" აუცილებლობას ხედავს:

"მე ვარ და ვიქნები მთავარი მებრძოლი საზოგადოებრივი თანხმობის მიღწევაში... მე მაქვს უდიდესი პასუხისმგებლობა: არ დავუშვა ის, რაც საქართველოს სახელმწიფოებრიობას შეუქმნის საფრთხეს, მაქსიმალურად ავიცილოთ პროვოკაციები. ამავდროულად აუცილებელია ჩვენი ჯარის თავდაცვისუნარიანობის გაზრდა, რათა ომის ტრაგედია არასოდეს გამეორდეს, დაცული მოქალაქე წინ იყურებოდეს და დაცული ტერიტორია სტაბილური განვითარების საფუძველს გვაძლევდეს. ჩვენი გაძლიერება არავის წინააღმდეგ არ არის მიმართული და არც არავის ემუქრება".

პრეზიდენტის თქმით, ომის საკითხი საზოგადოების კიდევ ერთი პოლარიზაციის და დაყოფის საფუძველი არ უნდა გახდეს, არამედ მისი შემკვრელი:

"ამისათვის აუცილებელია, გადავლახოთ სიძულვილი, ავამაღლოთ კულტურის დონე და სახელმწიფოებრივი ცნობიერება".

სალომე ზურაბიშვილმა ასევე გააჟღერა ის, თუ რა არის დღეს საქართველოს პასუხი რუსეთის ოკუპაციის მიმართ:

"ოკუპაციაზე ჩვენი პასუხი მარტივია — არა შეგუებას! ჩვენ არ ვეგუებით და არ შევეგუებით არც გალსა და ახალგორში ქართველების უფლებების შელახვას, არც ჩვენი ოსი და აფხაზი მოქალაქეების შევიწროებას და არც მათი ენის და იდენტობის გათელვას. ოკუპაციაზე ჩვენი პასუხია ასევე — პოლიტიკური და ეკონომიკური მდგრადობა, განვითარების გზის გაგრძელება... როგორც 2005 წელს შევძელით რუსული სამხრო ბაზების მშვიდობიანად გაყვანა საქართველოდან, მჯერა, რომ შევძლებთ ოკუპაციის დასრულებას და ახალი ურთიერთობის ჩამოყალიბებას".

პრეზიდენტი პარტნიორების მობილიზებაზე და მათ პრიორიტეტებად რუსულ-ქართული კონფლიქტის გაწყვეტაზე ამახვილებს ყურადღებას. მისი თქმით, ის გეგმავს, გაეროს უმაღლესი ტრიბუნიდან გააჟღეროს ეს.