აშშ-ს პრეზიდენტმა, დონალდ ტრამპმა თეთრ სახლში გამართულ ბრიფინგზე თქვა, რომ სიძულვილით მოტივირებულ დანაშაულზე და მასობრივ მკვლელობაზე სიკვდილით დასჯა უნდა დაწესდეს. მან შესაბამისი საკანონმდებლო ცვლილების მომზადების თხოვნით იურიდიულ დეპარტამენტს მიმართა.

ტრამპმა დასძინა ისიც, რომ სიკვდილით დასჯა ასეთ შემთხვევებში უნდა განხორციელდეს "სწრაფად, გადაწყვეტილად, წლობით გადადების გარეშე".

დონალდ ტრამპის განცხადებით, ამერიკის შეერთებულმა შტატებმა უნდა დაგმოს რასიზმი და სიძულვილი. ელ პასოში მომხდარ ტრაგედიას ფედერალური მთავრობა ადგილობრივ ტერორიზმად მოიხსენიებს, გამოძიება კი სიძულვილით მოტივირებული დანაშაულის ვერსიაზე მუშაობს.

Reuters-ის ცნობით, ტრამპმა არ უპასუხა იმ ბრალდებებს, რომ მისი ანტისაიმიგრაციო და რასისტული კომენტარები ასაზრდოვებს სიძულვილით მოტივირებულ დანაშაულს.

"ეს მავნე იდეოლოგიები უნდა დავამარცხოთ", — თქვა მან და დაამატა: "ამერიკაში სიძულვილის ადგილი არ არის. სიძულვილი აძლიერებს გონებას, ანგრევს გულს და ანადგურებს სულს".

გუშინ, 4 აგვისტოს აშშ-ში, ტეხასის ქალაქ ელ პასოში სროლის შედეგად 20 ადამიანი დაიღუპა და 26 დაშავდა. საქმეზე უკვე დაკავებულია 21 წლის კაცი, რომელიც პოლიციის ცნობით, დალასის მკვიდრია. რამდენიმე საათში ოჰაიოს შტატში, ქალაქ დეიტონში სროლის შედეგად ცხრა ადამიანი დაიღუპა და, სულ მცირე, 16 პირი დაშავდა.