მსოფლიოში ჰარი პოტერის პირველი წიგნის, ჰარი პოტერი და ფილოსოფიური ქვა, სულ 500 ეგზემპლარი არსებობს, რომელშიც ორი გრამატიკული შეცდომაა გაპარული. წიგნის უკანა ყდაზე სიტყვა "ფილოსოფოსი" არასწორად წერია, ხოლო წიგნის 53-ე გვერდზე, ხელსაწყოების სიაში, "1 wand," ანუ ჯადოსნური ჯოხი, ორჯერ წერია.

სწორედ ამ იშვიათი წიგნებიდან ერთ-ერთი გაიყიდა ახლახან აუქციონზე, არც მეტი, არც ნაკლები 34,500 დოლარად.

თუმცა, ეს პირველი შემთხვევა სულაც არ არის — ჯოან როულინგის ბესტსელერის პირველი გამოშვება უკვე დიდი ხანია რაც ძვირად ფასობს. მაგალითად, წლის დასაწყისში ერთ-ერთი მათგანი 83,359 დოლარად გაიყიდა.

ფოტო: Hansons

წიგნი, რომელიც წლების შემდეგ საკმაოდ სარფიანად გაიყიდა, 20 წლის უკან არის შეძენილი, სულ რაღაც 10,99 გირვანქა სტერლინგად.

მას შემდეგ, მის მფლობელს, რომელმაც აუქციონზე ანონიმურად დარჩენა ისურვა, აღარც გახსენებია, რომ იშვიათი ეგზემპლარის მფლობელი იყო. ცოტა ხნის წინ კი სახლში რემონტის გასაკეთებლად ფული დასჭირდა და წიგნების ექსპერტს სამ ყუთში მოთავსებული წიგნების შეფასება სთხოვა.

იშვიათი ეგზემპლარის ამოცნობა საკმაოდ მარტივი აღმოჩნდა, რადგან მასში ორი გრამატიკული შეცდომაა გაპარული. "იღებ ამ წიგნს და მაშინვე ამჩნევ ორ ტაიპოს, რომელიც მასშია გაპარული", — ამბობს ექსპერტი.

ჰარი პოტერი და ფილოსოფიური ქვა, ჯოან როულინგის ჰარი პოტერის რომანების სერიის პირველი წიგნია, რომელიც მწერალმა 1996 წელს დაწერა და 1997 წელს გამოსცა კიდეც.