რუსთავი 2-ის დამფუძნებელი დავით დვალი ფიქრობს, რომ ყოფილი თავდაცვის მინისტრი, ირაკლი ოქრუაშვილი რუსთავი 2-ის საქმესთან დაკავშირებით ხელისუფლების თამაშს თამაშობს.

ის დარწმუნებულია, რომ ქიბარ ხალვაშის ხელმოწერა, რომლის საფუძველზეც ირაკლი ოქრუაშვილი დავობს, რომ რუსთავი 2 მისია, ფალსიფიცირებულია.

"მე ვერ დავიჯერებ, რომ ქიბარ ხალვაშს ხელი აქვს მოწერილი ასეთ დოკუმენტზე და სამი წელი აგრძელებდა ბრძოლას რუსთავი 2-ისთვის, რადგან ეს წინ დახვდებოდა. ირაკლი ოქრუაშვილი ამ თავისი ხელმოწერითა და ბრალდებებით, უბრალოდ ხელისუფლების ტროლია. ეს ხელმოწერა ვითომ არის დამოკლეს მახვილი, რომელიც ჰკიდია ქიბარ ხალვაშის თავზე. განცდა მაქვს, ხალვაშსაც არ ენდობიან. თუ სცენარი ისე არ წავიდა, როგორც აქვთ დაგეგმილი, ხალვაშის წინააღმდეგ ამ მექანიზმს აამოქმედებენ. ირაკლი ოქრიაშვილი ივანიშვილის თამაშს თამაშობს", — განაცხადა დავით დვალმა პრესკონფერენციაზე.

რუსთავი 2-ის დამფუძნებლები ჯარჯი აქიმიძე და დავით დვალი ტელევიზიის ახალი მფლობელის ქიბარ ხალვაშის შეთავაზებაზე წილის 40 პროცენტზე უარს საჯაროდ ამბობს და სამართლებრივ დავას აგრძელებს.

მათ განცხადება გაავრცელეს, სადაც ნათქვამია, რომ არ აპირებენ თანამონაწილე სტატისტების როლში ყოფნას რუსთავი 2-ის კვლავ სახელმწიფო არხად გადაკეთების პროცესში.

"ხელისუფლებას არ გამოუვა სამართლიანობის აღდგენად გაასაღოს რუსთავი 2-ის უკანონო მფლობელთა ჯაჭვში შუალედური რგოლისთვის ტელევიზიის გადაცემა. ქართული ოცნება ისტორიაში შევა, როგორც რუსთავი 2-ის მიმტაცებელი უკვე მეორე ხელისუფლება", — ნათქვამია განცხადებაში.

ჯარჯი აქიმიძე და დავით დვალი ამბობენ, რომ 2004 წელს ნაციონალური მოძრაობის ხელისუფლების მიერ მიტაცებულ ტელევიზიაში გამოთავისუფლებულ ადგილს წარმატებით და მეთოდურად იკავებს 2012 წელს სამართლიანობის აღდგენის დაპირებითა და ვალდებულებით მოსული ქართული ოცნების ხელისუფლება. ისინი მიიჩნევენ, რომ 30 ივლისს რუსთავი 2-ის 40-პროცენტიანი წილის მათთის შეთავაზებაც ამის დასტურია.

მას შემდეგ, რაც რუსთავი 2-ის 100%-იანი წილის მფლობელი სტრასბურგის სასამართლოს გადაწყვეტილებით ქიბარ ხალვაში გახდა, მან რუსთავი 2-ის დამფუძნებლებს დვალსა და ხალვაშს წილის 40% შესთავაზა.

ქიბარ ხალვაშმა განაცხადა, რომ დავით დვალსა და ჯარჯი აქიმიძესთან რა მოლაპარაკებაც ჰქონდა, არ დავიწყებია. 2016-2017 წლებში, საქართველოს სასამართლოებში გამარჯვების შემდეგ ხალვაშმა განაცხადა, რომ ტელეკომპანიის 50%-ს, დავით დვალსა და ჯარჯი აქიმიძეს გადასცემს, როგორც წინა ხელისუფლებისგან დაზარალებულ აქციონერებს. მან დვალს ტელეკომპანიის დირექტორობაც შესთავაზა. თუმცა, ადგილობრივი და საერთაშორისო კრიტიკის შემდეგ დვალმა განაცხადა, რომ ის რუსთავი 2-ში ცენზორად არ დაბრუნდება და ხელისუფლების მორჩილი, პარტიული ტელევიზიის წილები მას არ აინტერესებს.

რუსთავი 2-ის საქმე

ადამიანის უფლებათა ევროპულმა სასამართლომ რუსთავი 2-ის საქმეზე ევროპული კონვენციის არცერთი მუხლის დარღვევა არ დაადგინა. ეს ნიშნავს, რომ ძალაში რჩება საქართველოს უზენაესი სასამართლოს გადაწყვეტილება, რომლის მიხედვითაც არხი ქიბარ ხალვაშს ეკუთვნის. გარდა ამისა, სტრასბურგის სასამართლომ საქართველოს უზენაესი სასამართლოს გადაწყვეტილების აღსრულების შეჩერების დროებითი მექანიზმიც გააუქმა. სწორედ ამ მექანიზმის გამო ვერ გადაიფორმა 2017 წელს ქიბარ ხალვაშმა რუსთავი 2.

სტრასბურგის სასამართლოს გადაწყვეტილების გამოცხადებიდან რამდენიმე საათში ქიბარ ხალვაშმა რეესტრს ტელეკომპანიის წილების გადმოფორმებაზე მიმართა, რაც რეესტრმა მალევე დაუკმაყოფილა. ახლა რუსთავი 2-ის 100%-ს მფლობელი ქიბარ ხალვაშია. ამასთანავე, ქიბარ ხალვაშმა დირექტორის თანამდებობიდან მოხსნა ნიკა გვარამია და თავისი ადვოკატი, პაატა სალია დანიშნა. რუსთავი 2-ის ჟურნალისტები აცხადებენ, რომ ქიბარ ხალვაში ხელისუფლების გეგმას ახორციელებს და კრიტიკული მედიის დახურვა სურთ. ისინი ახალი გენერალური დირექტორისგან და მფლობელისგან არხის სარედაქციო პოლიტიკის ხელშეუხებლობის გარანტიებს ითხოვენ. აღნიშნულს, ქიბარ ხალვაში არ დაეთახმა და "ახირება" უწოდა.