"ფუნდამენტური ფაქტორები არის საკმაოდ ძლიერი, აქედან გამომდინარე, ლარი ზედმეტად გაუფასურებულია", — ამის შესახებ პრემიერ-მინისტრმა მამუკა ბახტაძემ დღეს, 30 ივლისს ჟურნალისტებთან საუბრისას თქვა.

პრემიერის თქმით, ტურიზმის სექტორიდან მეტი შემოსავლის მობილიზების მოლოდინი არსებობდა, რაც მისი აზრით, ბოლო მოვლენების გამო ვერ მოხდა:

"ეკონომიკაში იყო მოლოდინი, რომ მეტი შემოსავლის მობილიზება მოხდებოდა ტურიზმის სექტორიდან. სამწუხაროდ, იმ მოვლენების გამო, რაც მოხდა, ეს ასე არ არის, მაგრამ ეს, რა თქმა უნდა, არ არის ერთადერთი ფაქტორი. ამავე დროს, მნიშვნელოვანია, ხაზი გავუსვათ იმას, რომ ნებისმიერი ანალიზი გვიჩვენებს, რომ დღეს ფუნდამენტური ფაქტორები არის საკმაოდ ძლიერი, აქედან გამომდინარე, ლარი ზედმეტად გაუფასურებულია".

პრემიერი აცხადებს, რომ ეროვნულმა ბანკმა უნდა აკონტროლოს ინფლაციის ნიშნული და აუცილებლად უნდა ჩაერიოს იმ შემთხვევაში, როდესაც პარამეტრები შეიცვლება.

ეროვნული ბანკის ოფიციალური კურსით, ერთი დოლარის ფასი 31 ივლისის მონაცემებით, 2,9507 ლარი გახდა. ახალი კურსით, 1 ევრო 2 თეთრით გაძვირდა და მისი ღირებულება 3,2889 ლარი გახდა.