24 ივლისს საქალაქო დუმის არჩევნებში მონაწილე ოპოზიციონერი კანდიდატების საცხოვრებელ სახლებში პოლიცია შევიდა. რუსული ოპოზიციური გამოცემის, Meduza-ს ცნობით, ერთ-ერთი მათგანი დმიტრი გუდკოვია. ინფორმაცია ჩხრეკის შესახებ ღამის ათ საათზე გავრცელდა.

MBK მედიის ცნობით, 10 პოლიციის ოფიცერი, სამი მათგანი უნიფორმაში, ხოლო 7 —სამოქალაქო ფორმებში, გუდკოვის სახლში მივიდა. პოლიცია შაბათს დაგეგმილი მასშტაბური საპროტესტო აქციის შესახებ მასალებს ეძებდა, რის შემდეგაც გუდკოვი დაკითხვაზე დაიბარეს.

მოგვიანებით გავრცელდა ინფორმაცია, რომ მოსკოვში სხვა ოპოზიციონერი კანდიდატების სახლებიც გაჩხრიკეს. გუდკოვის სახლის ჩხრეკიდან ერთ საათში პოლიცია მოსკოვის დუმის კანდიდატის ივან ზდანოვის სახლშიც მივიდა.

ასევე, სასამართლომ დაკავებულ ოპოზიციონერ კანდიდატს, ალექსეი ნავალნის, 30-დღიანი ადმინისტრაციული პატიმრობა შეუფარდა. მას კვლავ მიტინგის ჩატარების წესების დარღვევაში ადანაშაულებენ.

პროტესტი მოსკოვში

მოსკოვის დუმის არჩევნებზე ოპოზიციური კანდიდატების მხარდასაჭერად და სამართლიანი არჩევნების ჩატარების მოთხოვნით მორიგი აქციის გამართვა რუსეთის დედაქალაქში 27 ივლისს იგეგმება.

აქციის მონაწილეები მოსკოვის სათათბიროს არჩევნებში დამოუკიდებელი და ოპოზიციონერი კანდიდატების დაშვებას მოითხოვენ, მათ საარჩევნო კომისიას გადაწყვეტილების მისაღებად ერთკვირიანი ვადა მისცეს. კომისიამ რეგისტრაციაზე უარი 10-ზე მეტ ოპოზიციურ და დამოუკიდებელ კანდიდატს უთხრა.

მოსკოვის დუმის არჩევნები 8 სექტემბერს გაიმართება. არასაპარლამენტო პარტიებიდან კანდიდატების კენჭისყრაში მონაწილეობისთვის საჭირო იყო რამდენიმე ათასი იმ ამომრჩევლის ხელმოწერა, რომლებიც შესაბამის ოლქში არიან რეგისტრირებული. თავისი კანდიდატები არ წარუდგენია სავარაუდოდ, პარტიის დაბალი რეიტინგის გამო, "ედინაია როსიას". მისმა ყველა კანდიდატმა თვითონ წამოაყენა თავისი კანდიდატურა.

მათ შორის, ვისაც რეგისტრაციაზე უარი უთხრეს, არიან მოსკოველი დეპუტატები, ილია იაშინი და იულოია გალიამინა, ასევე კორუფციასთან ბრძოლის ფონდის თანამშრომლები ლიუბოვ სობოლი და ივან ჟდანოვი, პოლიტიკოსები დმიტრი გუდკოვი და სერგეი მიტროხინი.