ზუგდიდის ადგილობრივი გამოცემის ლაივპრესსის ცნობით, ზუგდიდის საკათედრო ტაძრის ეზოში სუფრაა გაშლილი და ჰომოფობიური საინიციატივო ჯგუფი ერთიანი და ზნეობრივი საქართველოსთვის ხელმოწერებს ლგბტ თემის წინააღმდეგ აგროვებს.

ფოტო: ლაივპრესი

ლაივპრესს მოძრაობის ხელმძღვანელმა გურამ ფალავანდიშვილმა განუცხადა, რომ უკვე მესამე დღეა, რაც ხელმოწერებს აგროვებენ და დაახლოებით 20-ათასამდე აქვთ. მანვე განმარტა, რომ ტრაპეზი მოქალაქეების მიერ შეგროვებული თანხით და ბიზნესმენ გიორგი ბერიშვილის ფინანსური დახმარებით ჩაატარეს.

ჰომოფობიური განცხადებებითა და დამოკიდებულებებით ცნობილმა გურამ ფალავანდიშვილმა თანამოაზრეებთან ერთად საინიციატივო ჯგუფი ერთიანი და ზნეობრივი საქართველო დააარსა. მან ხელმოწერების შეგროვება დაიწყო და ითხოვს, რომ ანტიდისკრიმინაციულ კანონში ცვლილებები შეიტანონ. კერძოდ, საქართველოს კანონმდებლობიდან ამოიღონ ტერმინები: "გენდერული იდენტობა" და "სექსუალური ორიენტაცია".