"მე ქიბარ ხალვაშისგან მივიღე პირობა, რომ არ მოხდება არხის სარედაქციო პოლიტიკაში ჩარევა. იმედი მაქვს, რომ შეასრულებს. მქონდა მასთანა ამზე საუბარი", — ასე პასუხობს რუსთავი 2-ის ახალდანიშნული დირექტორი პაატა სალია სარედაქციო დამოუკიდებლობის გარანტიაზე დასმულ კითხვას.

დღეს, 19 ივლისს რუსთავის 2-ის საინფორმაციო-პოლიტიკური დეპარტამენტის თანამშრომლებმა არხის ახალ მფლობელს და დირექტორს ერთობლივი განცხადებით მიმართეს. სარედაქციო დამოუკიდებლობის უზრუნველსაყოფად მათ გეგმა წარადგინეს, რომელიც საზოგადოებრივი საბჭოს შექმნას და საკადრო ცვლილებებზე მორატორიუმის გამოცხადებას ითვალისწინებს.

სტრასბურგის სასამართლოს გადაწყვეტილების გამოცხადებიდან რამდენიმე საათში ქიბარ ხალვაშმა რეესტრს ტელეკომპანიის წილების გადმოფორმებაზე მიმართა, რაც რეესტრმა მალევე დაუკმაყოფილა. ახლა რუსთავი 2-ის 100%-ს მფლობელი ქიბარ ხალვაშია. ამასთანავე, ქიბარ ხალვაშმა დირექტორის თანამდებობიდან მოხსნა ნიკა გვარამია და თავისი ადვოკატი, პაატა სალია დანიშნა.