ირაკლი ოქრუაშვილი ტელეკომპანია რუსთავი 2-ის წილების დაყადაღების მოთხოვნით თბილისის საქალაქო სასამართლოს მიმართავს. მომავალ კვირას კი წილების გადაცემის მოთხოვნით სარჩელის შეტანაც იგეგმება.

"2004 წელს ირაკლი ოქრუაშვილმა შეიძინა რუსთავი 2-ის 100%-იანი წილი და გადაუფორმა ქიბარ ხალვაშს თანხის მიღების გარეშე. არავისთვის უცხო არაა, რომ ხალვაში არამარტო რუსთავი 2-ის ნაწილში, არამედ სხვა ბიზნესებშიც წარმოადგენდა ოქრუაშვილს", — განაცხადა ოქრუაშვილის თანაპარტიელმა რუსთავი 2-ის ეთერში.

ადვოკატის ინფორმაციით, შეთანხმება, რომელიც ხალვაშსა და ოქრუაშვილს შორის არსებობს, ოქრუაშვილის გარეშე ტელეკომპანიის გასხვისების შემთხვევაში ხალვაშსს შვიდი მილიონი ლარი უნდა გადაეხადა.

გუშინ, 18 ივლისს სტრასბურგის სასამართლოს გადაწყვეტილება გახდა ცნობილი, რომლის მიხედვითაც, საქართველოს რუსთავი 2-ის საქმის განხილვის დროს არც ერთი მუხლი არ დაურღვევია. ამავე გადაწყვეტილებით გაუქმდა რუსთავი 2-ის წილების გადაფორმებაზე დაწესებული შეზღუდვა და საჯარო რეესტრმა ქიბარ ხალვაში ტელეკომპანია რუსთავი 2-ის მფლობელად დაარეგისტრირა.