შინაგან საქმეთა სამინისტროს განცხადებით, 20 ივნისის აქციაზე ჯგუფური ძალადობის ბრალდებით კიდევ სამი პირი დააკავეს. აღნიშნულ საქმეზე გამოძიება საქართველოს სისხლის სამართლის კოდექსის 225-ე და 315-ე მუხლებით.

უწყების მტკიცებით, 20-21 ივნისს, პარლამენტის მიმდებარე ტერიტორიაზე განვითარებული მოვლენებისას, დაკავებულები მონაწილეობდნენ ჯგუფურ ძალადობაში, სხვადასხვა საგნით თავს დაესხნენ პოლიციელებს და პარლამენტში შეჭრას ცდილობდნენ.

შსს განცხადებით, 1974 წელს დაბადებული პირი, თავს დაესხა სამართალდამცველებს, კერძოდ აყენებდა მათ ფიზიკურ შეურაცხყოფას და ურტყამდა ხელკეტს. უწყებაში ამბობენ, რომ 1994 წელს დაბადებულმა კიდევ ერთმა ბრალდებულმა სამართალდამცველებს წაართვა თავდაცვითი დანიშნულების საგანი. რაც შეეხება მესამე, 1989 წელს წელს დაბადებულ პირის, შსს-ში აცხადებენ, რომ ის სამართალდამცველებს ურტყამდა ფარს.

აქციაზე ჯგუფური ძალადობის ორგანიზების, ხელმძღვანელობისა და მასში მონაწილეობის ბრალდებით, დღეის მდგომარეობით, პასუხისგებაშია მიცემული 12 პირი. მათ შორის პარლამენტის წევრი ნიკა მელია, რომელსაც ბრალი ედება ჯგუფური ძალადობის ხელმძღვანელობასა და მასში მონაწილეობაში.