რუსეთის პრეზიდენტმა, ვლადიმერ პუტინმა ხელი მოაწერა კანონპროექტს, რომელიც ტურისტულ კომპანიებს პილიგრიმული მოგზაურობის მოწყობა აეკრძალებათ. ახალი კანონი ძალაში 2019 წლის პირველი ნოემბრიდან შევა.

როგორც კრემლის ვეგბვერდზეა აღნიშნული, კანონპროექტით პილიგრიმის, პილიგრიმული მოგზაურობისა და პილიგრიმული საქმიანობის მნიშვნელობა განისაზღვრა. კერძოდ კი დგინდება, რომ პილიგრიმი არის პირი, რომელიც მოგზაურობს, რათა რელიგიური მნიშვნელობის ძეგლები მოინახულოს და რელიგიურ ცერემონიებში მიიღოს მონაწილეობა. ფედერალური კანონის მიხედვით, მოგზაურობას დაგეგმვა და მოწყობა შეუძლია უშუალოდ პილიგრიმს, რელიგიურ ორგანიზაციას ან შვილობილ ორგანიზაციას, რომელიც პილიგრიმულ საქმიანობას ეწევა. ტურისტული ფირმები პილიგრიმულ მოგზაურობას ვეღარ მოაწყობენ.

რუსული გამოცემა Current Time-iს ინფორმაციით, პილიგრიმული ცენტრები მოგზაურობას ადრეც აწყობდნენ, თუმცა, როგორც ყველა ტურისტულ სააგენტოს, მოგზაურთა რისკები უნდა დაეზღვიათ. ახალი კანონით, რელიგიური ორგანიზაციები რისკების დაზღვევისგან თავისუფლდებიან.

როგორც გამოცემა წერს, დისკუსია იმის შესახებ თუ ვის ეკუთვნის პილიგრიმული მოგზაურობის მოწყობა დიდი ხანი მიმდინარეობდა. კანონის ცვლილების ერთ-ერთი ლობისტი რუსეთის პატრიარქი კირილე იყო. ჯერ კიდევ 2005 წელს რუსეთის რელიგიათა საბჭომ კანონპროექტი შეიმუშავა, რომლის მთავარი არგუმენტი იყო, რომ ტურისტული ფირმები პილიგრიმობისთვის საჭირო სულისკვეთებას ვერ ქმნიან.

პილიგრიმობის შესახებ კანონის გარდა ბოლო ერთ წელში კიდევ რამდენიმე შესწორება მიიღეს, რომელიც რელიგიური ორგანიზაციების მუშაობას ეხება. 2018 წელს პუტინმა ხელი მოაწერა კანონს, რომლითაც რუსეთში რელიგიური ორგანიზაციები არ არიან ვალდებული თანამშრომლების ხელფასი დადგენილ მინიმუმს მიაბან, ანუ შეუძლიათ იმაზე დაბალი ხელფასი მისცენ, ვიდრე ეს ხელისუფლებამ დაადგინა. ამასთანავე კირილეს ლობირებით, რელიგიური ორგანიზაციები აღარ არიან ვალდებული ბუღალტერია წარადგინონ, იმის მიუხედავად იხდიან თუ არა გადასახადს.