ტრამპის ადმინისტრაცია მიგრანტებისთვის თავშესაფრის მიღების წესებს ამკაცრებს. ახალი რეგულაციები ძირითადად სამხრეთ ამერიკელ მიგრანტებს ეხებათ.

BBC-ს ინფორმაციით, თავშესაფარს ვერ მიიღებენ მიგრანტები, რომლებმაც აშშ-ს სამხრეთ საზღვარზე მისასვლელად მესამე ქვეყანა გაიარეს და ტრანზიტულ ქვეყანაში თავშესაფარი არ მოითხოვეს. გამონაკლისი იქნებიან ტრეფიკინგის მსხვერპლები და ისინი, ვისაც თავშესაფარზე სხვა ქვეყანაში უარი უთხრეს. რეგულაციები ძალაში 16 ივლისიდან შევა.

ცვლილებები შეეხება მიგრანტების იმ უმრავლესობას, რომლებიც აშშ-ში მოსახვედრად მექსიკას გადიან. მათი დიდი ნაწილი გვატემალადან, ჰონდურასიდან და სალვადორიდან არიან, ანუ აშშ-ში თავშესაფრის მიღებისთვის მათ ჯერ თავშესაფარი მექსიკას უნდა სთხოვონ.

აშშ-ს გენერალურმა პროკურორმა უილიამ ბარმა განაცხადა, რომ აშშ-მექსიკის საზღვარზე უცხოელების დიდი რაოდენობაა და მათგან მხოლოდ "მცირე ნაწილი იმსახურებს" თავშესაფარზე უფლებას.

"თავშესაფრის მოთხოვნის შესახებ უსაფუძვლო განაცხადების დიდი რაოდენობა საიმიგრაციო სისტემას აწვება, ძირს უთხრის თავშესაფრის მიღების ჰუმანიტარულ მიზნებს და აძლიერებს ადამიანების კონტრაბანდის ჰუმანიტარულ კრიზისს", — განაცხადა ბარმა.

მექსიკა ახალ რეგულაციებს არ იზიარებს. ამასთანავე, გაეროში ამბობენ, რომ ახალი ზომები დარტყმის ქვეშ დააყენებს მოწყვლად ჯგუფებს, რომლებსაც ძალადობისგან დასაცავად საერთაშორისო დაცვა სჭირდებათ.