აჭარის ტელევიზიისა და რადიოს მრჩეველთა საბჭომ ხელფასები გაიზარდა. მათი გადაწყვეტილებით, მრჩეველთა საბჭოს თავმჯდომარის ხელფასი თვეში 3 300 ლარით იქნება, თავმჯდომარის მოადგილის — 3 100, ხოლო წევრების — 3 025. გადაწყვეტილება ძალაში გუშინ, 11 ივლისიდან შევიდა.

საბჭოს თავმჯდომარემ, ნატა იმედიაშვილმა On.ge-ს უთხრა, რომ ხელფასების გაზრდა კანონით სავალდებულო იყო. მისი განმარტებით, ტელევიზიის ბიუჯეტი 2019 წელს გაიზარდა, შესაბამისად, საბჭოს წევრების ხელფასებიც უნდა გაზრდილიყო. იმედაიშვილი ამბობს, რომ ვინაიდან, წლის დასაწყისში ტელევიზიას პრობლემები ჰქონდა, საბჭომ ხელფასების გაზრდის საკითხი არ დააყენა. მისივე თქმით, ის ახლაც ეწინააღმდეგებოდა ხელფასების გაზრდას, თუმცა, საბჭომ ხმათა უმრავლესობით მიიღო ეს გადაწყვეტილება.

ჰონორარების გაზრდამდე, მრჩეველთა საბჭოს თავმჯდომარის ხელფასი 2 900 ლარი იყო, მოადგილის — 2 700, ხოლო წევრების — 2 625.