"პირადად მე არ ვყოფილვარ, მაგრამ ვიცი, რომ გერმანიის ელჩი, რომელმაც დამირეკა პარლამენტში იყო", — ასე გამოეხმაურა საქართველოში საფრანგეთის ელჩი პასკალ მენიე გიორგი გახარიას განცხადებას, რომ 20 ივნისის ღამეს მასთან ერთად პარლამენტში ელჩები იმყოფებოდნენ. ელჩის კომენტარის თარგმანი რუსთავი 2-მა გაავრცელა.

მან დააზუსტა, რომ არ იცის, რა დრომდე იყო გერმანიის ელჩი პარლამენტში, "არ მიუღია სატელეფონო ზარი" ან "შეიძლება გამორჩა". მისივე თქმით, 20 ივნისის ღამეზე გამოძიება სახალხო დამცველის ჩართლობით უნდა ჩატარდეს.

"რაც შეეხება გიორგი გახარიას გადადგომას ან დარჩენას, მისი პირადი პასუხისმგებლობის საქმეა. ჩემი აზრით, პოლიტიკოსებმა უნდა შეაფასონ ახლანდელი სიტუაცია, მაშინდელიც და შემდგომ მიიღონ გადაწყვეტილება. მე მის მაგივრად გადაწყვეტილებას ვერ მივიღებ. დიპლომატები აქ დასახმარებლად იმყოფებიან. ჩვენ გვინდა, რომ საქართველო წარმატებული იყოს. ნამდვილად არ გვახარებს იმის ნახვა, როგორაა საზოგადოება დაყოფილი. ჩემი აზრით, ყველამ პატივი უნდა სცეს წესებს. ჩვენ ვერ ვიქნებით პასუხისმგებელი მთავრობის მიერ მიღებულ გადაწყვეტილებებზე. თუ აზრს გვკითხავენ ვეუბნებით. მაგრამ ისინი არიან არჩეული. ეკისრებათ პოლიტიკური პასუხისმგებლობა და მათი ვალია ხალხის წინაშე იმოქმედონ შეგნებულად", — განაცხადა საქართველოში საფრანგეთის ელჩმა.

გიორგი გახარიას განცხადება, რომ ის პარლამენტში ელჩებთან ერთად აკვირდებოდა განვითარებულ მოვლენებს, საგარეო საქმეთა სამინისტროს წარმომადგენელს ვლადიმერ კონსტანტინიდს "პირველად ესმის".