ონლაინგამოცემა ტაბულას პიკაპი, რომელშიც ანტისაოკუპაციო აქციის აპარატურა ეწყო, შიანაგან საქმეთა სამინისტრომ ავტოსადგომზე გადაიყვანა, ხოლო მძღოლს კითხავენ. როგორც უწყებაში On.ge-ს უთხრეს რუსთაველის გამზირზე ავტოსაგზაო შემთხვევა მოხდა, რა დროსაც ქვეითი პატრული დაშავდა. სამართალდამცავი კლინიკაშია გადაყვანილი.

შინაგან საქმეთა სამინისტრომ გამოძიება სისხლის სამართლის კოდექსის 276-ე მუხლით არის დაწყებული, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

8 ივლისს რუსთაველის გამზირზე ერთდროულად ორი აქცია მიმდინარეობდა. აქცია #სირცხვილიას მონაწილეებს ჰომოფობიურად განწყობილმა ჯგუფებმა პარლამენტის წინ დადგომის საშუალება არ მისცეს და არც აპარატურა ააწყობინეს. საათების განმავლობაში ორ აქციას პოლიციის კორდონი და ყვითელი ავტობუსები ჰყოფდა.

როგორც გამოცემაში ამბობენ, #სირცხვილიას ორგანიზატორები რუსთაველზე შეკრებილებს სწორედ ტაბულას კუთვნილ პიკაპზე მოწყობილი სცენიდან მიმართავდნენ. მათივე თქმით, მანქანის საბარგულში ეწყო რამდენიმე ტელევიზიის, ასევე, პარტია ევროპული საქართველოს კუთვნილი აპარატურაც.

გამოცემის დამფუძნებელი თამარა ჩერგოლეიშვილი ამბობს, რომ მაქანა და მძღოლი სპეციალურად წაიყვანეს, რათა აპარატურის გარეშე აქცია ვეღარ გაგრძელებულიყო. მისივე თქმით, მძღოლის გარდა პოლიციამ მგზავრებიც გადაიყვანა.