საქართველოს განათლების, მეცნიერების, კულტურისა და სპორტის მინისტრის, მიხეილ ბატიაშვილის განცხადებით, მიხეილ გიორგაძემ პირველი მოადგილის პოსტი თავისი გადაწყვეტილებით დატოვა. ბატიაშვილი დარწმუნებულია, რომ გიორგაძე კარგ საქმეს გააკეთებს კერძო სექტორში.

"რაც შეეხება კულტურის მიმართულებას, — მე ვფიქრობ, რომ საჭიროა რეფორმები, ახალი საერთაშორისო და ადგილობრივი პროექტები, დაინტერესებული მხარეების მეტი ჩართულობა, პრობლემების პროაქტიული გადაწყვეტა. ეს ყველაფერი მოითხოვს ახლებურ მიდგომებს და ჩვენ ამას გავაკეთებთ", — უპასუხა ჟურნალისტების კითხვას მიხეილ ბატიაშვილმა.

განათლების, მეცნიერების, კულტურისა და სპორტის მინისტრის პირველმა მოადგილემ მიხეილ გიორგაძემ თანამდებობა დატოვა. ამის შესახებ მან ფეისბუქის საკუთარ გვერდზე დაწერა და განმარტა, რომ გადაწყვიტა კერძო სექტორში დაბრუნდეს.

განათლების სამინისტროსთან კულტურის სამინისტროს შერწყმის შემდეგ, ყოფილი მინისტრი, მიხეილ გიორგაძე გაერთიანებული სამინისტროს პირველი მოადგილე გახდა. 2017 წლის 15 დეკემბრიდან 2018 წლის 15 ივლისამდე იგი საქართველოს კულტურისა და სპორტის მინისტრი იყო.