შინაგან საქმეთა მინისტრის მოადგილის ნათია მეზვრიშვილის განცხადებით, მნიშვნელობა არ აქვს ვინ გასცა დარბევის ბრძანება 20 ივნისის ღამეს. მისივე თქმით, აქ მთავარია იყო თუ არა პოლიციელების ქმედება კანონიერი. თუმცა მინისტრის მოადგილე იმასაც აცხადებს, რომ პოლიციას გარკვეულ სიტუაციაში ბრძანების გარეშე მოქმედების უფლება აქვს.

"ყველამ იხილა ალბათ ის ფაქტი როგორ სტაცებდნენ თავდაცვის საშუალებებს ამ ადამიანებს, როგორ იტაცებდნენ კორდონიდან, როგორ ხდებოდა მათი განიარაღება. მაინტერესებს, თქვენ რომ პოლიციელი იყოთ ასეთ შემთხვევაში დაელოდებოდით თუ არა ვინმეს ბრძანებას. რა თქმა უნდა, არა. კანონით შეიძლება როგორც ბრძანების საფუძველზე მოქმედება, ისე ბრძანების გარეშე. იყო გარკვეული ქმედებები, რომლის განხორციელება კანონით ბრძანების გარეშე შეუძლებელია და იყო ქმედებები, პოლიციელების მხრიდან, რომელთან დაკავშირებითაც პოლიციას მოქმედების შესაძლებლობა აქვს", — განუცხადა მეზვრიშვილმა ჟურნალისტებს.

მისივე თქმით, არავის მისცემენ იმის შესაძლებლობას, რომ უდანაშაულო პოლიციელები, რომლებიც იმ "სახელმწიფო ინსტიტუტებს იცავდნენ", რომელთა "სიცოცხლეს და ჯანმრთელობას საფრთხე ემუქრებოდა", რომელთაც "კორდონიდან ათრევდნენ", რომლებსაც "რკინის საგნებს, სხვადასხვა ბლაგვ საგნებს უმიზნებდნენ და ურტყამდნენ სახალხო წესით გასამართლება მოხდეს"

"იქ, სადაც კონკრეტული გადაცდომები იყო და იქ კონკრეტულმა პირებმა დანაშაული ჩაიდინეს შესაბამისი შედეგები დადგება", — ნათია მეზვრიშვილმა.

#სირცხვილია

საქართველოში ანტისაოკუპაციო აქციები #სირცხვილია მე-14 დღეა მიმდინარეობს. სამოქალაქო პროტესტი რუსი დეპუტატის სერგეი გავრილოვის საქართველოში ვიზიტმა და პარლამენტის თავმჯდომარის სკამიდან რუსულ ენაზე განცხადების გაკეთებამ გამოიწვია. შედეგად, გავრილოვმა საქართველო დატოვა, პარლამენტის თავმჯდომარე გადადგა. რუსეთმა საქართველოს "დასჯა განიზრახა" და სანქციების ბერკეტი აამოქმედა: რუსულ ავიახაზებს საქართველოში ფრენა აუკრძალა, რამდენიმე ღვინის ექსპორტიორი კომპანია დაბლოკა და აქციები "რუსოფობიად" მოიხსენია. ამის პარალელურად, დიპლომატიურმა კორპუსმა და მოქალაქეებმა ტურისტების მოზიდვის მიზნით დაიწყეს კამპანია #spendyoursummeringeorgia.

პარლამენტის თავმჯდომარის გადადგომას წინ უსწრებდა 20 ივნისის ღამე, როცა შსს-ს სპეციალურმა რაზმმა აქცია ძალის გამოყენებით რეზინის ტყვიებით, ცრემლსადენი გაზითა და წყლის ჭავლით დაშალა. მათი პოზიციით, იგეგმებოდა საქართველოს პარლამენტზე, როგორც ინსტიტუტზე შტურმი და დამხობა. დაშლის დროს დაშავდა ასობით ადამიანი, მათგან ორმა თვალი დაკარგა, ერთ-ერთი კი ამ დრომდე კომატოზურ მდგომარეობაში, სამედიცინო დაწესებულებაში რჩება. შედეგად, აქციები ამ დრომდე გრძელდება შინაგან საქმეთა მიინისტრის გიორგი გახარიას გადაგომის მოთხოვნით.