ბათუმში მდებარე კლუბ UP2U-ს პუტინის მხარდამჭერი ჯგუფის, A-Studio-ს კონცერტის გამართვასთან დაკავშირებით გადაწყვეტილება ამ დრომდე არ მიუღია. ამის შესახებ კლუბის მფლობელმა, ირაკლი ფირანიშვილმა On.ge-ს განუცხადა.

ფირანიშვილმა On.ge-სთან პირველ ივლისს თქვა, რომ გადაწყვეტილებას ორ ივლისს მიიღებდნენ. თუმცა, ამ ეტაპზე უცნობია, გააუქმებენ, გადადებენ თუ გამართავენ ჯგუფის კონცერტს. კლუბის მეპატრონემ განაცხადა, რომ "რუსეთის მიმართ აგრესიის" გამო კონცერტის გადადება ან გაუქმება განიხილება.

კონცერტი 27 ივლისს არის დაგეგმილი. რუსეთში მოღვაწე ქართველი მომღერალი, ქეთა თოფურია, რომელიც ჯგუფის სოლისტია, პუტინის პოლიტიკის აქტიური მხარდამჭერია. 2010 წელს საბჭოთა კავშირისადმი მიძღვნილ ღონისძიებაზე ის სცენაზე სამხედრო ფორმით წარსდგა და სიმღერა "ჩვენ გვჭირდება ერთი გამარჯვება" შეასრულა. 2013 წელს, 12 ივნისს რუსეთის დღისადმი მიძღვნილ კონცერტზე თოფურიამ წითელ მოედანზე, რუსეთის დროშის ფერებში გაფორმებული კაბით იმღერა.

2018 წლის 5 მარტს მომღერალმა თქვა, რომ "რუსეთის საპრეზიდენტო არჩევნებში პუტინი რომ არ აირჩიონ, 2008 წელი სიზმარი იქნება". 2018 წლის 17 მარტს კი მან გრიგორი ლეპსთან და რუსული ესტრადის სხვა წარმომადგენლებთან ერთად ვლადიმერ პუტინის წინასაარჩევნო მხარდასაჭერ კლიპში იმღერა.