ზაზა ხალვაშის მიერ გადაღებული 2017 წლის ფილმის, Namme-ს ოპერატორი გიორგი შველიძე ამერიკის კინოაკადემიამ ახალ წევრად აირჩია.

The Hollywood Reporter-ის ინფორმაციით, 59 ქვეყნიდან ჯამში 842 ახალი წევრი შეირჩა, მათ შორის არიან როგორც მსახიობები, ისე მუსიკოსები, მწერლები, ასევე ქასთინგ-მენეჯერები, კოსტიუმის დიზაინერები, გრიმიორები და ა.შ. წევრების 50% ქალია, ხოლო 29% — ფერადკანიანი.

გიორგი შველიძის გარდა, შერჩეულთა შორის არიან ლედი გაგა, ტომ ჰოლანდი, ადელი, კლერ ფოი, ელიზაბეტ მოსი და სხვები. სრული სია ჰოლივუდ რეპორტერმა გამოაქვეყნა.

გიორგი შველიძემ, ამა წლის აპრილში, მოსკოვში ჩასვლაზე უარი თქვა. ის ევრაზიის კინოდაჯილდოებაზე საუკეთესო ოპერატორის ნომინაციაზე იყო წარდგენილი.

შველიძეს ნამესთვის უკვე მიღებული აქვს ისეთი პრესტიჟული ჯილდო, როგორიც ამერიკის კინოოპერატორთა საზოგადოების პრიზია. ის პირველი ქართველი იყო, რომელიც ამ ნომინაციაზე წარადგინეს.