რუსეთის პრეზიდენტმა, ვლადიმერ პუტინმა, დიდი ოცეულის სამიტამდე, Financial Times-თან ინტერვიუში თქვა, რომ ლიბერალიზმი "მოძველდა".

იდეოლოგია, რომელსაც დასავლეთში დემოკრატიის განვითარება ეფუძნება, რუსეთის პრეზიდენტის სიტყვებით თავი არსებობის მიზანს დროში გასცდა.

მან ასევე ევროპასა და ამერიკაში აღმოცენებული პოპულიზმი შეაქო და თქვა, რომ მულტიკულტურალიზმის მსგავსმა იდეებმა "სიმტკიცე დაკარგეს". ინფორმაციას BBC ავრცელებს.

"[ლიბერალებს] არავისთვის არაფრის მითითება შეუძლიათ, იმის მიუხედავად, რომ ათწლეულებია ამას ცდილობენ", — განაცხადა პუტინმა, რომელიც მეოთხე ვადითაა არჩეული რუსეთის პრეზიდენტად.

ის დასძენს, რომ ლიბერალიზმი მოსახლეობის უმრავლესობის ინტერესებს ეწინააღმდეგება და რითიც გერმანიის კანცლერის, ანგელა მერკელის გადაწყვეტილებაზე მიუთითებს, რომელმაც მიგრანტების დიდ ნაწილს გერმანიაში შესვლის უფლება მისცა.

"ლიბერალიზმის იდეოლოგიის მიხედვით, არაფერი არაა გასაკეთებელი. მიგრანტებს შეუძლიათ დაუსჯელად მოკლან, გაძარცვონ და გააუპატიურონ, რადგან მათი, როგორც მიგრანტების უფლებები, დაცულია", — ამბობს პუტინი.

66 წლის პუტინმა ლგბტ თემის უფლებებზეც ისაუბრა და განაცხადა, რომ რუსეთს ლგბტ თემის წარმომადგენლებთან "პრობლემა არ აქვს", თუმცა მათ თავისუფლად ცხოვრების უფლებას არ მისცემს:

"არავისთვის მსურს ტრამვის მიყენება, რადგან ჩვენ ჰომოფობიას გვაბრალებენ. მაგრამ ჩვენ ლგბტ თემის წარმომადგენლებთან პრობლემა არ გვაქვს. თუმცა ღმერთმა დაგვიფაროს, მათ ისეთი ცხოვრების უფლება მივცე, როგორიც სურთ. რაღაცები ჩვენთვის მეტისმეტია. ისინი ამბობენ, რომ ბავშვებს 5-6 გენდერული როლით ცხოვრება შეუძლიათ.

ყველას ვაძლევთ ბედნიერად ცხოვრების უფლებას, ამის პრობლემა არ გვაქვს, მაგრამ მათ ჩვენი კულტურის, ტრადიციებისა და იმ მილიონობით ადამიანის ტრადიციული ოჯახის ღირებულებების დაჩრდილვის უფლებას არ მივცემთ, რომლებიც უმრავლესობას წარმოადგენენ".

ინტერვიუში პუტინმა ასევე შეაქო ამერიკის პრეზიდენტი, დონალდ ტრამპი და მას "ნიჭიერი ადამიანი" უწოდა, რომელმაც "იცის, როგორ მოექცეს ამომრჩეველს".

ევროკავშირის პრეზიდენტი დონალდ ტუსკი დღეს პუტინის ინტერვიუს გამოეხმაურა და ჟურნალისტებს უთხრა, რომ მის მოსაზრებებს სრულად ეწინააღმდეგებოდა:

"ის, ვინც ამბობს, რომ ლიბერალიზმი ძველმოდურია, ასევე ამბობს, რომ მოძველებულია თავისუფლების ცნება, კანონის უზენაესობა და ადამიანის უფლებები. მე ძველმოდურად მეჩვენება ავტორიტარიზმი, პერსონალური კულტები და ოლიგარქების მმართველობა, რომელიც შესაძლოა ვინმეთვის ეფექტიანი ჩანდეს".