"რუსეთის ცნობით, საქართველო უსაფრთხო ქვეყანა არ არის, საქართველოში მყოფი რუსები კი საპირისპიროს ფიქრობენ", — ამ სათაურით BBC-მ საქართველოში მიმდინარე მოვლენებზე სტატია გამოაქვეყნა.

გამოცემა რუსული ტელევიზიის Russia 1-ის წამყვანის ოლგა სკაბეევას მიმართვას აქვეყნებს: "სახელმწიფო გაფრთხილებთ, რომ საქართველოში უსაფრთხოების გარანტიას ვერავინ მოგცემთ". ტელეწამყვანი რუს ტურისტებს არიგებს, რომ "არ შეიძლება გაცვალონ ღირსება თბილისში ჩასვლისას ერთ ბოთლ უფასო ღვინოზე".

BBC-ის ცნობით, Russia 1-ის წამყვანი "უფრო შორს წავიდა" და თქვა: "საქართველოში რუსებს კლავენ".

ამ განცხადებებისა და ვლადიმერ პუტინის სანქციების ფონზე, BBC წერს, რომ საქართველოში რუსოფობია არ არის და რუსებს, რომლებიც საქართველოში უკვე იყვნენ, განსხვავებული შეხედულებები აქვთ.

"ჩვენ არ ვუსმენთ პუტინის რჩევას და საკუთარი შეხედულებები გვაქვს", — უთხრა რუსმა ტურისტმა BBC-ის. გამოცემა წერს, რომ ტურისტების უმრავლესობა, რომლებსაც შარდენის ქუჩაზე გაესაუბრნენ რუსეთიდანაა და არც ერთი მათგანი თავს საფრთხის ქვეშ არ გრძნობს.

"რუსების მიმართ დამოკიდებულება უარყოფითი არ არის. ხალხი მეგობრულია და ჩემი შვილების უსაფრთხოებაზე ზრუნავს", — უთხრა BBC-ის ტურისტმა.

სხვა ტურისტები აცხადებენ, რომ "ფრენების აკრძალვით რუსეთმა ხალხს დამატებითი პრობლემა შეუქმნა, თუმცა მაინც ჩამოვლენ ბელორუსიისა და თურქეთის გავლით".

გამოცემა ესაუბრა ანნა დენისოვას, რომელიც ოჯახთან ერთად საქართველოში საცხოვრებლად 2 წლის წინ გადმოვიდა და შავი ზღვის სანაპიროზე სასტუმროს უძღვება.

"აქ 10 წლის განმავლობაში ჩამოვდიოდით და მცირეოდენი უარყოფითი დამოკიდებულებაც ჩვენს, როგორც რუსების მიმართ, არ მიგრძვნია", — აცხადებს ანნა. მისივე ცნობით, სასტუმროს ვიზიტორებიდან უმრავლესობა რუსია, თუმცა ფრენების აკრძალვის შემდეგ ჯავშნების გაუქმება დაიწყო.

BBC ასევე წერს ფეისბუქში დაწყებულ კამპანიაზე #spendyoursummeringeorgia. #SpendYourSummerInGeorgia ახალგაზრდების მიერ დაწყებული კამპანიაა, რომლის მიზანიც საქართველოს მხარდაჭერაა რუსეთის ტურისტული ემბარგოს საპასუხოდ. ამ ჰეშთეგით მსოფლიოს მოქალაქეებს მოუწოდებენ ჩამოვიდნენ და დაისვენონ საქართველოში და არ დატოვონ ქვეყანა მარტო რუსეთის ეკონომიკურ სანქციებთან.

20 ივნისს თბილისში ჩაშლილი მართმადიდებლური საპარლამენტო ასამბლეის და დუმის დეპუტატის, სერგეი გავრილოვის გაძევების საპასუხოდ ვლადიმერ პუტინმა რუსულ ავიახაზებს საქართველოში ფრენა აუკრძალა. აქედან 24 საათში აკრძალვა ქართულ ავიახაზებზეც გავრცელდა. მოგვიანებით, კი რუსეთმა 8 ქართულ კომპანიას ღვინის შეტანა აუკრძალა. რუსეთის მიზანი საქართველოს ეკონომიკაზე და ხელისუფლებაზე ზეწოლაა.

მეცხრე დღეა საქართველოს პარლამენტთან ანტიოკუპაციური აქცია #სირცხვილია იმართება. აქციის მონაწილეებს სამი მოთხოვნა აქვთ: შს მინისტრის გიორგი გახარიას გადადგომა, პროპორციული წესით არჩევნების ჩატარება და 20-21 ივნისის პროტესტის დაშლის დროს დაკავებულების გათავისუფლება. აქედან, მხოლოდ ერთი მოთხოვნა დარჩა შესასრულებელი — შს მინისტრის გადადგომა.

ამავე თემაზე: