პრინცმა უილიამმა თქვა, რომ მისი შვილები რომ გეები ყოფილიყვნენ მათ მხარს დაუჭერდა.

თუმცა, ბრიტანეთის სამეფო ოჯახის წევრი დასძენს, რომ როგორც მშობელი ინერვიულებდა იმ წნეხის გამო, რომლის გავლაც მათ საზოგადოებისგან მოუწევდათ.

"მე სრულად დავუჭერ მხარს მათ ნებისმიერ გადაწყვეტილებას, მაგრამ, მშობლის პერსპექტივიდან მაშინებს ის ბარიერები, სიძულვილის შემცველი ფრაზები და დისკრიმინაცია, რაც მათ შეიძლება შეხვდეთ", — თქვა მან.

კემბრიჯის ჰერცოგის სიტყვები მისი და ქეით მიდლტონის საქველმოქმედო ქმედებებს მოჰყვა, რომელიც ლგბტ ახალგაზრდებში უსახლკარობის პრობლემის შემცირებაზეა ფოკუსირებული. პრინცი უილიამი სამეფო ოჯახის პირველი წევრია, რომელიც ლგბტ უფლებების დამცველ ორგანიზაციას ეწვია.

უილიამი დასძენს, რომ მან ამ თემაზე ფიქრი მას შემდეგ დაიწყო, რაც მამა გახდა. მისი სიტყვებით, ისურვებდა ისეთ სამყაროში ცხოვრებას, სადაც ადამიანებს სექსუალური ორიენტაციის გამო არ ჩაგრავენ.

კემბრიჯის ჰერცოგი ბრიტანეთის სამეფო ოჯახის პირველი წარმომადგენელია, რომელიც 2016 წელს, ბრიტანული გეი ჟურნალის, The Attitude ყდაზე გამოჩნდა.