ქართული ოცნების ლიდერი და დეპუტატი არჩილ თალაკვაძე ამბობს, რომ აბსურდი და სიცრუეა ნიკა გვარამიას განცხადება, თითქოს, რუსთავი 2-ის აღებაზე მიმდინარეობს მსჯელობა. ამის შესახებ ქართული ოცნების ოფისში საგანგებო ბრიფინგი დღეს, 23 ივნისს საღამოს გაიმართა. თალაკვაძის შეფასებით, ეს განცხადება რუსთაველის გამზირზე მიმდინარე საპროტესტო აქციის მუხტის შენარჩუნებას ემსახურება:

"ნაციონალურმა მოძრაობამ და მისმა მთავარმა პროპაგანდისტულმა მანქანამ მიმართა უბინძურეს პროვოკაციას. ისინი ქართულ საზოგადოებას უხმობენ, არარსებული საფრთხისგან რუსთავი 2-ის დასაცავად... არავითარი საფრთხე საქართველოში არცერთ მედიას არ ემუქრება, მითუმეტეს ხელისუფლების მხრიდან. ნიკა გვარამიას მონათხრობი არის სრული აბსურდი და სიცრუე".

ტელეკომპანია რუსთავი 2-ის გენერალურ დირექტორის თქმით, ხელისუფლება ტელევიზიის ძალადობრივად აღებას განიხილავს. მან თქვა, რომ ეს ინფორმაცია ორი წყაროსგან მიიღო, მათ შორის ერთი ხელისუფლების მაღალი რგოლის წარმომადგენელია. მისივე თქმით, შესაძლოა, გასაჯაროვდეს ჩანაწერები, რომელიც არხში შესვლის მოტივად გამოიყენონ.