საქართველოს ყოფილმა პრემიერ-მინისტრმა 20 ივნისს პარლამენტთან განვითარებული მოვლენები შეაფასა და განაცხადა, რომ ხელისუფლებამ მიუტევებელი შეცდომა დაუშვა. მისი თქმით, მთავრობაში პირველი შეცდომა [სერგეი გავრილოვის თავმჯდომარის სკამში დაჯდომა] აღიარეს, მაგრამ პოლიტიკური რეაგირება დააგვიანეს. მისივე თქმით, სამართლიანად აზვირთებული მუხტი ოპონენტებმა "დესტრუქციულად წარმართეს", რის შემდეგაც ხელისუფლებამ უფრო მძიმე შეცდომა დაუშვა.

"რეზინის ტყვიებით დაცხრილა საპროტესტო აქციის მონაწილე ახალგაზრდები, ქვეყნის მომავალი თაობის წარმომადგენლები. როდესაც მხოლოდ ერთი ათწლეული გაშორებს მოვლენებს (განსაკუთრებით თბილისის პოლიციის შენობის წინ საპროტესტო აქციას ვგულისხმობ), რომლის დროსაც უამრავი ადამიანი დასახიჩრდა პლასკიკური ტყვიით და რამდენიმემ მხედველობაც დაკარგა, ვფიქრობ იგივე ტყვიების გამოყენება გუშინდელ აქციაზე ხელისუფლების მიუტევებელი შეცდომა იყო", — წერს კვირიკაშვილი ფეისბუქგვერდზე.

ექსპრემიერი ამბობს, რომ პროფესიულ პოლემიკაში წასვლა არ სურს, მაგრამ პოლიციელების ადგილზე დროულად მიყვანა, ან მხოლოდ ცრემლსადენი გაზისა და წყლის ჭავლის გამოყენება საკმარისი იქნებოდა დემონსტრანტების შესაჩერებლად. ამავდროულად, ის ამბობს, რომ პოლიციელების კორდონზე შეტევა გაუმართლებელია.

კვირიკაშვილის თქმით, ხელისუფლება აგრძელებს შეცდომების სერიას და ფიქრობს, რომ მუხტი მინელდება პარლამენტის თავმჯდომარის გადადგომით.

"ეს, შესაძლოა, დროებით ასეც მოხდეს, მაგრამ პირველივე შემდეგი უხეში შეცდომის შემთხვევაში გაცილებით უფრო ფართო და სახიფათო ფორმით გამოვლინდება. ამის მიზეზი კი იქნება, უპირველეს ყოვლისა, ხელისუფლების აცდენა მოსახლეობის განწყობებთან, ანუ ლეგიტიმაციის დეფიციტი, რომელიც გამომდინარეობს ხელისუფლების ბოლო პერიოდის შეცდომებიდან და შედეგად მოსახლეობის დიდი ნაწილის სულ უფრო მზარდი პოლიტიკური აპათიიდან, რაც, მათ შორის, გამოიხატება არჩევნებში მონაწილეობისგან თავშეკავებაში", — აცხადებს ის.

კვირიკაშვილი ხელისუფლებას "ჩიხიდან გამოსასვლელად" პოლიტიკურ რეფორმებს სთავაზობს, რომელიც 4 ნაბიჯს მოიცავს. კერძოდ, გახარიას პოლიტიკური პასუხისმგებლობის საკითხს, რიგგარეშე საპარლამენტო არჩევნების დანიშვნას, საკონსტიტუციო ცვლილებებს მომდევნო არჩევნების პროპორციული წესით ჩასატარებლად და არჩევნებში მონაწილეობის მიღების სავალდებულოდ გახდას.

მისი თქმით, ეს შეიძლება ეწინააღმდეგებოდეს არჩევანის თავისუფლების იდეას, მაგრამ ბევრ დემოკრატიულ ქვეყანაში მუშაობს. მისივე თქმით, ეს დაასრულებს გაუთავებელ საუბარს მმართველი ძალის პარტიული კოორდინატორების არაპროპორციულ გავლენაზე საარჩევნო პროცესზე და შედეგად პოლიტიკურ სპექტრს გაამრავალფეროვნებს.

20 ივნისის აქცია

20 ივნისს ღამით ოკუპაციის გასაპროტესტებლად შეკრებილი მოქალაქეები სამართალდამცავებმა რეზინის ტყვიებით, ცრემლსადენი გაზითა და წყლის ჭავლის დაშალეს. დაშავებულია ათეულობით მოქალაქე, ორს თვალი აქვს დაკარგული. დაკავებულია 305 აქციის მონაწილე. დაშავებულებიდან სამედიცინო დაწესებულებაში 55 პაციენტი რჩება. მათგან 3 რეანიმაციულ განყოფილებაში, მართვით სუნთქვაზე იმყოფება.

მოქალაქეების პროტესტი საქართველოში რუსი დეპუტატების ჩამოსვლას მოჰყვა. მართლმადიდებლობის საპარლამენტთაშორისო ასამბლეის ფარგლებში, რომელიც 19-22 ივნისს უნდა გამართულიყო, საქართველოში 25 ქვეყნის დელეგაცია ჩამოვიდა, მათ შორის რუსეთის დუმის სამი დეპუტატი. ასამბლეის წაყვანის დროს სერგეი გავრილოვი საქართველოს პარლამენტის თავმჯდომარის სკამზე იჯდა, რასაც ოპოზიციისა და სამოქალაქო სექტორის მხრიდან პროტესტი მოჰყვა. ოპოზიციის წევრები პლენარულ სხდომათა დარბაზში შევიდნენ და თავმჯდომარის ადგილი დაიკავეს, გავრილოვს კი დარბაზში შესვლის უფლებას არ აძლევდნენ. ისინი ამბობდნენ, რომ თავმჯდომარის ადგილას ოკუპანტი ქვეყნის დეპუტატი, რომელმაც აფხაზეთი და ცხინვალი დამოუკიდებელ ქვეყნებად აღიარა, არ უნდა იჯდეს.

საბოლოოდ, ასამბლეის სესია შეწყდა და რუსმა დეპუტატებმა ქვეყანა დატოვეს. ხელისუფლების წარმომადგენლები ამბობდნენ, რომ სხდომა ასამბლეის გენერალურ მდივანს, ბერძენ დეპუტატს უნდა წაეყვანა და ეს პროტოკოლის მიხედვით იყო განსაზღვრული. მათ ისიც ახსენეს, რომ გავრილოვის მხრიდან ეს იყო მიზანმიმართული პროვოკაცია.

გავრილოვის მიერ სკამის დაკავებას საპროტესტო ტალღა მოჰყვა. მოქალაქეებმა ანტისაოკუპაციო აქციები მოაწყეს. დღის ბოლოს კი პარლამენტის წინ შეიკრიბნენ. ოპოზიციის წევრები ითხოვდნენ ირაკლი კობახიძის, ვახტანგ გომელაურისა და გიორგი გახარიას გადადგომას. აქციის მონაწილეების ნაწილმა პარლამენტში შესვლა სცადა და ცენტრალურ გამზირზე მობილიზებულმა სპეცრაზმმა მათი დაშლა დაიწყო.