ევროკომისიის პრეზიდენტ ურსულა ფონ დერ ლაიენის თვითმფრინავი GPS ნავიგაციის ჩახშობის სამიზნე ბულგარეთში დაჯდომისას გახდა. ამის შესახებ ინფორმაციას CNN კომისიის სპიკერზე დაყრდნობით ავრცელებს.

მისივე თქმით, კომისიამ ბულგარული მხარისგან მიიღო ინფორმაცია, რომ "ეს უხეში ჩარევა, სავარაუდოდ, რუსეთის მიერ იყო განხორციელებული".

თვითმფრინავი უსაფრთხოდ დაეშვა, თუმცა CNN-ის წყაროს ცნობით, მფრინავებმა ქაღალდის რუკებით ისარგებლეს.

"ეს შემთხვევა კიდევ უფრო განამტკიცებს ჩვენს ურყევ ვალდებულებას, გავაძლიეროთ თავდაცვითი შესაძლებლობები და უკრაინის მხარდაჭერა," — აღნიშნა სპიკერმა.

ფონ დერ ლაიენის ვიზიტი ბულგარეთში ევროკავშირის იმ ქვეყნების ტურის ნაწილი იყო, რომლებიც რუსეთს, ბელარუსსა და შავ ზღვას ესაზღვრებიან.