"მეტროს ფუნქციონირება შეზღუდული იყო იმ სამუშაოებიდან გამომდინარე, რაც ჩატარდა. ძირითადად, ეს იყო მოსაცდელში არსებული თაღის ჭერის გამაგრება, შესაბამისი ხსნარებით და ბეტონით", — ამის შესახებ თბილისის მერმა, კახა კალაძემ განაცხადა. მისი თქმით, მეტროსადგურ "ვარკეთილის" სრული რეაბილიტაციის პროცესი წლის ბოლოსთვის დასრულდება.

"რამდენიმე დღის წინ ჩვენ ადგილზე ვიმყოფებოდით და გავაკეთეთ განმარტებები, რომ რეაბილიტაციის პროცესი წლის ბოლოსთვის უნდა იყოს დასრულებული. მეტროს ფუნქციონირება შეზღუდული იყო იმ სამუშაოებიდან გამომდინარე, რაც ჩატარდა. ძირითადად, ეს იყო მოსაცდელში არსებული თაღის ჭერის გამაგრება, შესაბამისი ხსნარებით და ბეტონით. ამ სამუშაოების ჩატარება აუცილებელი იყო, რათა იმ კონსტრუქციამ, რომელიც რეაბილიტაციის პროცესში უნდა დაეკიდოს, წლებს გაუძლოს. პროექტი ვერ განხორციელდებოდა მაშინ, როდესაც მეტრო მგზავრებს ემსახურება, ამიტომ დროებით მოგვიწია მეტროს ფუნქციონირების შეჩერება", — განაცხადა კახა კალაძემ.

მეტროსადგური ვარკეთილი 45-დღიანი დაკეტვის შემდეგ დღეს გაიხსნა. თბილისის მერიის ინფორმაციით, მიმდინარე სარეაბილიტაციო სამუშაოებიდან გამომდინარე, სადგური მგზავრებს შეცვლილი სამუშაო განრიგით ემსახურება. სტანდარტული სამუშაო განრიგისგან განსხვავებით, მეტროსადგურმა მუშაობა 07:00 საათზე დაიწყო და 23:00 საათზე დაასრულებს.