ფსიქიკური ჯანმრთელობისა და ნარკომანიის პრევენციის ცენტრის თანამდებობაზე ლევან ჩაკვეტაძეს ირაკლი დავითაშვილი შეცვლის. ის აღნიშნულ პოსტზე ოცნების ხელისუფლების ჯანდაცვის მინისტრმა მიხეილ სარჯველაძემ წარადგინა.

"ფსიქიკური ჯანმრთელობისა და ნარკომანიის პრევენციის ცენტრს ახალი ხელმძღვანელი ჰყავს. სამედიცინო დაწესებულებას ირაკლი დავითაშვილი უხელმძღვანელებს, რომელიც თანამშრომლებს, ჯანდაცვის მინისტრმა წარუდგინა.

მიხეილ სარჯველაძემ ახალ ხელმძღვანელს სამომავლო საქმიანობაში წარმატებები უსურვა და აღნიშნა, რომ ერთობლივი ძალისხმევით, ფსიქიკური ჯანმრთელობისა და ნარკომანიის პრევენციის მიმართულებით, არაერთი მნიშვნელოვანი რეფორმა განხორციელდება ირაკლი დავითაშვილს, როგორც საჯარო, ისე კერძო სექტორში მუშაობის დიდი გამოცდილება გააჩნია. მას ჯანდაცვის სამინისტროში არაერთ მნიშვნელოვან პოზიციაზე აქვს ნამუშევარი.

მინისტრმა, გაწეული მხარდაჭერის, თანამშრომლობისა და პროდუქტიული მუშაობისთვის, მადლობა ცენტრის ყოფილ ხელმძღვანელ ლევან ჩაკვეტაძესაც გადაუხადა," — აღნიშნულია ფსიქიკური ჯანმრთელობისა და ნარკომანიის პრევენციის ცენტრის მიერ გავრცელებულ ინფორმაციაში.

ლევან ჩაკვეტაძემ თანამდებობა წინა კვირაში საკუთარი განცხადების საფუძველზე დატოვა. მან ამ პოსტზე რამდენიმე თვე იმუშავა.