"ის რაც ამა წლის 28 აგვისტოს განხორციელდა ანი ქავთარაძის და მისი ოჯახის მიმართ შემოსავლების სამსახურის მხრიდან სარფის საბაჟო პუნქტზე — არის პოლიტიკური რეპრესიების ნაწილი და მას კავშირი არ აქვს სამართალთან," — ასე ეხმაურება კოალიცია ცვლილებისთვის წევრი, ადვოკატი მარიკა არევაძე მისი თანაგუნდელის, ანი ქავთარაძისთვის სარფის საბაჟოზე 19 000 დოლარის ჩამორთმევის ფაქტს.

მარიკა არევაძის განცხადებით, რომ არა ანი ქავთარაძის პოლიტიკური საქმიანობა, "არ მოხდებოდა ის, რაც მოხდა". ადვოკატი მიიჩნევს, რომ ანი ქავთარაძის შვილების მიმართ არასათანადო მოპყრობა მოხდა, როდესაც "ბავშვები საათების განმავლობაში, სრულიად უსაფუძვლოდ და ხელოვნურად დატოვეს წყლის, საკვების და ელემენტარული დასაჯდომი საშუალების გარეშე".

მარიკა არევაძის განცხადებით, საქართველოს ტერიტორიაზე შემოსვლისას, თუ პირს თან აქვს ნაღდი ფული, რომლის ოდენობაც ერთი სრულწლოვანი პირის შემთხვევაში აღემატება 30 000 ლარს, ექვემდებარება დეკლარირებას.

"ის რაც ამა წლის 28 აგვისტოს განხორციელდა ანი ქავთარაძის და მისი ოჯახის მიმართ შემოსავლების სამსახურის მხრიდან სარფის საბაჟო პუნქტზე — არის პოლიტიკური რეპრესიების ნაწილი და მას კავშირი არ აქვს სამართალთან.

ანი არაერთხელ გამხდარა რეპრესიის მსხვერპლი და ეს მისთვის არ ახალია, თუმცა ამ შემთხვევაში უკვე რეპრესიების მსხვერპლი პირდაპირი ფორმით აღმოჩნდა მისი ოჯახიც — მეუღლე და სამი შვილი, მათ შორის ერთი არასრულწლოვანი და ორი მცირეწლოვანი.

რომ არა ანი ქავთარაძის პოლიტიკური საქმიანობა, ვინაიდან ის არის პოლიტიკოსი, პარტია ახალის პოლიტიკური საბჭოს წევრი და პოლიტიკური საბჭოს თავმჯდომარის მოადგილე, რომელიც აქტიურად არის ჩართული ქვეყანაში მიმდინარე პროცესებში — არ მოხდებოდა ის, რაც მოხდა 28 აგვისტოს.

იყო ოპოზიციონერი პოლიტიკოსი, ეს მართლაც დიდი რისკი და სტრესია და ეს ყველაფერი ჩვენს გარდა აისახება ჩვენი ოჯახის წევრებზე, ყველა რეპრესია და ძალადობა არაპირდაპირ მოქმედებს ასევე ჩვენი ოჯახის წევრებზე, მაგრამ ანის შემთხვევაში უკვე პირდაპირ მოხდა არასათანადო მოპყრობა მისი შვილების მიმართ, როდესაც ბავშვები და მათ შორის ერთი ორ წლამდე ბავშვი საათების განმავლობაში, სრულიად უსაფუძვლოდ და ხელოვნურად დატოვეს წყლის, საკვების და ელემენტარული დასაჯდომი საშუალების გარეშე!!!

რაც შეეხება სამართლებრივ მხარეს, საქართველოს ტერიტორიაზე შემოსვლისას, თუ პირს თან აქვს ნაღდი ფული, რომლის ოდენობაც ერთი სრულწლოვანი პირის შემთხვევაში აღემატება 30 000 ლარს, ის ექვემდებარება დეკლარირებას. მოცემულ შემთხვევაში:

თანხა ერთ სრულწლოვან პირზე არ აღემატებოდა 30 000 ლარს, შესაბამისად არ ექვემდებარებოდა დეკლარირებას;

თანხის შესახებ თავად განაცხადეს საბაჟო პროცედურების გავლის დროს; შესაბამისად, თუ თანხის ოდენობა ექვემდებარებოდა დეკლარირებას საბაჟოს შესაბამის თანამშრომელს უნდა მოეხდინა ამ პროცედურის შეთავაზება, რადგან დეკლარირება ხდება ადგილზე;

თანხის წარმოშობა და მიზნობრიობა არ დამდგარა ეჭვის ქვეშ. გარდა ამისა, ოჯახს გააჩნია თანხის წარმოშობის მტკიცებულება, რადგან მოგზაურობის დაწყებამდე ანი ქავთარაძემ გაყიდა მანქანა და ახალი მანქანის შეძენის მიზნით სწორედ ეს თანხა წაიღეს თან. ასევე გააჩნია თანხის მიზნობრიობის მტკიცებულებები;

მებაჟეების მიერ, მტკიცებულებების მოთხოვნის, საკითხის შესწავლის გარეშე მოხდა თანხის ჩამორთმევა. ანუ ადგილი ჰქონდა მიზანმიმართულ მოქმედებას მებაჟეების მხრიდან.

ამ შემთხვევის პოლიტიკურ სარჩულზე მიუთითებს ასევე ოცნების პროპაგანდისტული არხებით ანის ოჯახზე სიცრუის გავრცელება.

ანი ქავთარაძე ამ ყველაფერზე ახდენს რეაგირებას და სამართლებრივი დავები იქნება ყველა, მიმართულებით," — წერს ადვოკატი მარიკა არევაძე სოციალურ ქსელში.

"TV პირველთან" საუბრისას ქავთარაძე ამბობს, რომ ამ თანხით ოჯახს ავტომობილის შეძენა სურდა, რომელიც მისი პირადი ავტომობილის გაყიდვის შედეგად ჰქონდა მიღებული. ერთ-ერთმა პროპაგანდისტულმა მედიამ კი გაავრცელა ინფორმაცია, რომ ამ ფულით ოპოზიციონერი პოლიტიკოსი საპროტესტო აქციების დაფინანსებას გეგმავდა.

ანი ქავთარაძე მომხდარი ფაქტის გამო სასამართლოში სამართლებრივ დავას იწყებს.

გაიგეთ მეტი:

• ანი ქავთარაძე სარფის საბაჟოზე $19 000-ის ჩამორთმევის გამო სამართლებრივ დავას იწყებს