ქართულმა ოცნებამ პარლამენტთან განვითარებულ მოვლენებთან დაკავშირებით საგანგებო ბრიფინგი გამართა. პრემიერ-მინისტრის, მამუკა ბახტაძის განცხადებით, ხელისუფლებლამ მომხდარ ფაქტზე მყისიერად იმოქმედა — შეწყდა ფორუმი და რუსეთის დელეგაციამ დატოვა თბილისი.

მისი განცხადებით, ხალხის პროტესტით დესტრუქციულმა ძალამ ისარგებლა და ეს პროტესტი პოლიტიკურად გამოიყენა. ბახტაძის თქმით, მათ იძალადეს პოლიციელებზე. მისივე განცხადებით, "ყველა, ვისმა ქმედებებმაც შექმნა ეს ვითარება, პასუხს აგებს". გარდა ამისა, პრემიერმა თქვა, რომ გამოვლინდება და დადგება იმ ადამიანების პასუხისმგებლობის საკითხი, ვინც მონაწილეობას იღებდა კონფერენციის ორგანიზებაში მონაწილეობას. პრემიერმა ასევე განაცხადა, რომ ხელისუფლება თითოეული მოქალაქის უსაფრთხოებას დაიცავს.

"რევანშისტული ოპოზიციის მხრიდან ადგილი ჰქონდა ჯგუფური ძალადობის ორგანიზებას, მათ შტურმი მიიტანეს საქართველოს პარლამენტზე და მთელმა საზოგადოებამ პირდაპირ ეთერში იხილა, როგორ იძალადეს ჩვენც პოლიციელებზე. შედეგად შეიქმნა ვითარება, რომელიც გაცდა დღის პირველ ნახევარში განვითარებული მოვლენებით გამოწვეულ სამართლიან რეაქციას და მივიღეთ რევანშს მოწყურებული, დესტრუქციული პოლიტიკური ლიდერების მიერ ორგანიზებული ძალადობა. სამწუხაროდ, უპასუხისმგებლო ოპოზიციის მიერ ინსპირირებული დაპირისპირების შედეგად დაშავდნენ ჩვენი მოქალაქეები და პოლიციელები", — თქვა პრემიერმა.

მისივე განცხადებით, პარლამენტზე და პოლიციის ძალებზე შტურმს ხელმძღვანელობდნენ დესტრუქციული პოლიტიკური ძალები, რომლებმაც მისივე თქმით, კიდევ ერთხელ ისარგებლეს ჩვენი თანამოქალაქეების გულწრფელი ემოციით. პრემიერის განცხადებით, პოლიციამ იმოქმედა კანონის ფარგლებში, დაიცვა სახელმწიფო, საზოგადოება და აღკვეთა დანაშაული.