პატრიოტთა ალიანსის დეპუტატი, ემზარ კვიციანი ამბობს, რომ პატრიოტები ციხეში სხედან და გამყიდველებმა პარლამენტს ალყა შემოარტყეს. ამის შესახებ მან ჰომოფობიური აქციების ერთ-ერთი ორგანიზატორის, გურამ ფალავანდიშვილის დაკავებასთან დაკავშირებით ვერის ბაღში განაცხადა.

"წეღან ოკუპაცია მოახდინეს პარლამენტის, უცხო ხალხი, არაპარლამენტარები შემოცვიდნენ და კაციშვილმა ხელი არ მოკიდა, ფალავანდიშვილი [ციხეში] რატომ უნდა იჯდეს? ორმაგი სტანდარტები. ოდნავ პატრიოტიზმი თუ ვინმეს აცხია, ყველანი ციხეში და გამყიდველებმა პარლამენტს ალყა შემოარტყეს", — თქვა კვიციანმა მოქალაქეებზე, რომლებმაც რუსი დეპუტატის, სერგეი გავრილოვის პარლამენტის თავმჯდომარის სავარძელზე დაჯდომა გააპროტესტეს.

დღეს, 20 ივნისს მართლმადიდებლობის საპარლამენტთაშორისო ასამბლეის წევრი და რუსი დეპუტატი, სერგეი გავრილოვი პარლამენტში, ირაკლი კობახიძის სავარძელზე დაჯდა. ეს ფაქტი გააპროტესტა ვიცე-სპიკერმა თამარ ჩუგოშვილმა და პრეზიდენტმა სალომე ზურაბიშვილმა. თავდაპირველად, უმრავლესობის წევრმა, ზაქარია ქუცნაშვილმა თქვა, რომ "სადღაც რუსს რომ დავინახავთ, არ უნდა გავნადგურდეთ", მოგვიანებით კი განმარტა, რომ "თუ საჭიროა, პოლიტიკურ პასუხისმგებლობას აიღებს".