"დროა — მშვიდობა ომზე მეტია!" — ამ სახელწოდებით ხვალ, 21 ივნისს, 20:00 საათზე თბილისში, თავისუფლების მოედანზე აქცია გაიმართება.

აქციის ორგანიზატორების ინფორმაციით, ისინი ადამიანების ჩაგვრასა და სიძულვილს გააპროტესტებენ. მათივე თქმით, კონკრეტული კითხვები ექნებათ მართლმადიდებელი ეკლესიის პატრიარქთან, ილია მეორესთან, წმინდა სინოდთან, საქართველოს პრემიერ და შინაგან საქმეთა მინისტრებთან და ასევე ლევან გორგოძესთან, ლაშა ტალახაძესთან, ზაზა ფაჩულიასთან და მამუკა გორგოძესთან.

"დღეს ჩვენ ვხედავთ, როგორ ვკარგავთ სახელმწიფოს, ვხედავთ ზიზღით გაჟღენთილ საზოგადოებას. ვხედავთ? საერთოდ ვერ ვხედავთ ხელისუფლებას, ვერ ვგრძნობთ რომ პატრონი გვყავს, ვერ ვგრძნობთ თავს დაცულად და ვდგავართ აშკარა პროვოკაციის წინაშე. პროვოკაციის, რომელიც აწყობს მხოლოდ ერთადერთ ქვეყანას. ვხედავთ დაჩაგრულ ადამიანებს და ვხედავთ, როგორ ექმნება საფრთხე ჩვენს კონსტიტუციას!" — ნათქვამია განცხადებაში.

ისინი მოუწოდებენ მოქალაქეებს, შეუერთდნენ აქციას.

"მოგმართავთ ისევ იმ ადამიანებს, ვინც ჩვენი ცხოვრებით ვცხოვრობთ, ვისაც არ გვაინტერესებს პოლიტიკოსები, ორგანიზაციები, მხარეები, არ გვაქვს სხვა ინტერესები, გარდა ერთისა — ვიცხოვროთ გამართულ სახელმწიფოში მშვიდობიანად და სიყვარულით. ჩვენ არ უნდა დავუშვათ ეს სიძულვილი და დაპირისპირება, არ უნდა დავუშვათ ზიზღი ერთმანეთისადმი... ჩვენ მივდივართ თავისუფლების მოედანზე რომ დავსვათ კონკრეტული კითხვები და უარი ვუთხრათ სიძულვილს და ძალადობას. არ დავუშვათ საზოგადოების გახლეჩვა და დაპირისპირება. ამიტომ გთხოვთ, რომ შემოგვიერთდეთ, კლასელებს, მეგობრებს, მშობლებს, დედებს, ნათესავებს, ყველა იმ ადამიანს, ვისთვისაც ძვირფასია ამ ქვეყანაში ცხოვრება", — აღნიშნულია განცხადებაში.