ბიზნესმენი, ლევან ვასაძე მხარდამჭერებს მოუწოდებს, კომბლები სხვენში შეაწყონ. ამის შესახებ მან ვიდეომიმართვაში განაცხადა.

"მინდა, გაგიკეთოთ ერთი ძალიან დიდი საჩუქარი — მე მინდა, რომ ჩვენს მხარდამჭერებს, ჩვენს სახალხო საპროტესტო მოძრაობას მოვუწოდო, რომ კომბლები შეაწყონ სხვენში. როგორც გახსოვთ, კომბლები არასდროს იყო განკუთვნილი ამ უბედური მამათმავლებისა და მათი პროპაგანდისტებისთვის. ეს იყო იმ შემთხვევისთვის, თუ პოლიცია შეგვდგებოდა ჩვენ წიხლებით და დაგვიწყებდა ცემას", — თქვა ვასაძემ.

მისი განცხადებით, რადგან შინაგან საქმეთა სამინისტრომ თქვა, რომ პრაიდი არ იქნება და რადგან მისივე თქმით, ეს სიტყვა გუშინ შეასრულა, მისგან სახელმწიფომ ეს საჩუქარი მიიღო.

"კომბლები ჩამოვიღოთ მაშინ, როცა მოვა ის მთავრობა, რომელიც კიდევ ერთხელ გაგვიბედავს, რომ პრაიდს ჩაგიტარებთ... ჩვენ იქ მოვალთ შიშველი ხელებით, ხელზე თეთრი ცხვირსახოცებით", — აღნიშნა ვასაძემ.