ნეონაცისტური დაჯგუფება ქართული მარშის ლიდერი სანდრო ბრეგაძე უერთდება ლევან ვასაძის ჰომოფობიურ და ძალადობრივ მოძრაობას. ბრეგაძის თქმით, მათ ჰქონდათ საკუთარი სტრატეგია, რომ მშვიდად შეწინააღმდეგებოდნენ თბილისი პრაიდს, მაგრამ რადგან ვასაძემ ინიციატივა აიღო, ახლა ერთად უნდა იბრძოლონ და არავის აქვს უფლება "თვითშემოქმედება გამოიჩინოს".

ბრეგაძეს მიაჩნია, რომ თუ "დამარცხდება ვასაძე", მაშინ მთელი საქართველო "დამარცხდება". ხოლო გამარჯვების შემთხვევაში პირიქით. დამარცხება-გამარჯვება კი ბრეგაძისთვის პრაიდის ჩაშლასთან და ჩატარებასთან ასოცირდება.

"შეიძლება გარკვეულ საკითხებში ჩვენ გვქონდეს განსხვავებული სტრატეგია და ტაქტიკა, მაგრამ ის, რომ აღლუმი არ უნდა ჩატარდეს ამაში არათუ ვუერთდებით, ერთიანი ვართ ყველანი. ჩვენ ველოდებით ბატონი ლევან ვასაძის ქმედებებს", — განაცხადა მან TV პირველის ეთერში, გადაცემა რეაქციაში.

ბრეგაძე ამტკიცებს, რომ ლგბტ აქტივისტები პროვოკატორები არიან და არ ითვალისწინებენ უმრავლესობის აზრს. ის თბილისი პრაიდის ორგანიზატორებს "ანგაჟირებულ მოღალატეებს უწოდებს", რადგან მათ აზრს არ ითვალისწინებენ და წინააღმდეგობის მიუხედავად, ღირსების მარშს მართავენ.

რამდენიმე დღის წინ სანდრო ბრეგაძემ პრესკონფერენცია გამართა, სადაც განაცხადა, რომ ქართული მარში პრაიდს მშვიდობიანი გზით, კერძოდ ლოცვით დაუპირისპირდებოდა. რაც შეეხება ლევან ვასაძეს, ის პრაიდის ჩაშლას ძალადობრივი გზებით: კომბლებით, ქამრებით და ყურის აწევით გეგმავს.

გაიგეთ მეტი: