რესპუბლიკელების ლიდერი, დავით უსუფაშვილი დღეს გავრცელებულ ფარულ ჩანაწერებთან დაკავშირებით ამბობს, რომ არჩევნებამდე რამდენიმე დღით ადრე მსგავსი ტიპის ჩანაწერის გავრცელება მოსახლეობის ემოციური ფონის გაზრდისკენ არის მიმართული:

"არჩევნებამდე დარჩა 10 დღე. როგორც ჩანს, ამ 10 დღის განმავლობაში მომსწრე გავხდებით ისეთი მოვლენების, განცხადების, მოქმედების, რომელიც მიმართულია მოსახლეობის ემოციური ფონის გაზრდაზე. ვიღაცას აქვს იმედი, რომ ამ ემოციური ფონით წარმატებას მიაღწევს. ვისაც აზრად აქვს რაიმე დესტაბილიზაცია, მოქალაქეებმა უნდა ვუთხრათ მყარად, რომ ამ დღეების განმავლობაში განსაკუთრებით ჭკუადამჯდარი ვიქნებით".

ფარულ აუდიო ჩანაწერში, რომელიც 27 სექტემბერს გამოქვეყნდა, ისმის მიხეილ სააკაშვილისა და ერთიანი ნაციონალური მოძრაობის ლიდერების ხმა, რომლებიც თითქოს საუბრობენ საქართველოში მოვლენების რევოლუციური სცენარით განვითარებაზე. ჩანაწერში ისმის საუბარი რუსთაველის გამზირის კარვებით გავსებაზე, ივანიშვილის სახლთან აქციებზე, ასევე, მის მიმართ ფიზიკურ ანგარიშსწორებაზე, თუმცა, თავად საუბრის მონაწილეები აცხადებენ, რომ ეს საუბარი რეალური არ არის და ის სახელმწიფო უსაფრთხოების სამსახურის მიერაა დამონტაჟებული. ჩანაწერის ავთენთურობა ჯერ დადგენილი არ არის.