საქართველოს ყოფილი პრეზიდენტი და ოდესის ოლქის გუბერნატორი, მიხეილ სააკაშვილი ფეისბუკზე, თავის ოფიციალურ გვერდზე ეხმაურება სხვადასხვა მედიასაშუალების მიერ გავრცელებულ ფარულ ჩანაწერს, რომელსაც ის "უნიჭო მონტაჟს" უწოდებს:

"ასეთი უნიჭო მონტაჟებით სურს ივანიშვილს თავისი გარდაუვალი დამარცხების თავიდან აცილება? ჩვენი ხალხის გასულელება არ გამოუვა!".

ფარულ აუდიო ჩანაწერში, რომელიც 27 სექტემბერს გამოქვეყნდა, ისმის მიხეილ სააკაშვილისა და ერთიანი ნაციონალური მოძრაობის ლიდერების ხმა, რომლებიც თითქოს საუბრობენ საქართველოში მოვლენების რევოლუციური სცენარით განვითარებაზე. ჩანაწერში ისმის საუბარი რუსთაველის გამზირის კარვებით გავსებაზე, ივანიშვილის სახლთან აქციებზე, ასევე, მის მიმართ ფიზიკურ ანგარიშსწორებაზე, თუმცა, თავად საუბრის მონაწილეები აცხადებენ, რომ ეს საუბარი რეალური არ არის და ის სახელმწიფო უსაფრთხოების სამსახურის მიერაა დამონტაჟებული. ჩანაწერის ავთენთურობა ჯერ დადგენილი არ არის.

აკაკი ბობოხიძე, რომელიც, აღწერის მიხედვით ამ საუბრის ერთ-ერთი მონაწილეა, ჩანაწერს სასაცილოს უწოდებს:

"ბიძინა ივანიშვილი მოწყეტილია რეალობას. ეს ყველაფერი არის სასაცილო, სატირალი რომ არ იყოს იმიტომ, რომ ეს ავადმყოფი კაცი მართავს დღეს ჩვენს ქვეყანას. წელს არც სატელეფონო საუბარი მქონია მიხეილ სააკაშვილთან და წელს ამ შემადგენლობით, რა შემადგენლობაც ამ საუბარში ჩანს არ ვყოფილვართ. ეს შემადგენლობა გასულია საქართველოდან. ასე რომ, ეს საუბარი ვერ შედგებოდა ვერც ტელეფონით და ვერც პიროვნულად. ძალიან მარტივია და სუსმა შეიძლება რომ ამოიღოს საზღვრის კვეთის საბუთები".

ნაციონალური მოძრაობის კიდევ ერთი ლიდერი, გიგი წერეთელი ხელისუფლებას რეალური პრობლემების მოგვარებისკენ მოუწოდებს:

"ჩვენ ვართ იმ ფაზაში, როდესაც გვაქვს აქტიური პოლიტიკური ბრძოლა და მეტი რა უნდა იყოს. მე მართლა ვეუბნები, ვურჩევ გავიდნენ ხალხს დაელაპარაკონ და პრობლემებზე იზრუნონ, ამ სისულელეებს თავი დაანებონ".

მმართველი გუნდის წევრი, მანანა კობახიძე მიიჩნევს, რომ აუცილებლად უნდა დაიკითხოს საუბარში მონაწილე ყველა პირი: "გამოძიება უნდა წარიმართოს და ყველა კითხვა დაისვას, თუ ასეთი გეგმა ნამდვილად არსებობს ან არსებობდა, მას შეიძლება ის შედეგი ჰქონდეს, რომ სახელმწიფოს წინააღმდეგ დანაშაული არის დასჯადი და ყველა პასუხს აგებს აუცილებლად. არავითარი საფუძველი არ არსებობს არანაირი გადატრიალებისა და თუ რევოლუციისა, ქართული საზოგადოება ამას არ დაუშვებს".

ქართული ოცნების კიდევ ერთი წევრის, გიორგი ვოლსკის თქმით, სახელმწიფოს აქვს რესურსი, რომ ნებისმიერი არეულობა მოაგვაროს:

"რაც შეეხება მოლოდინებს, მე მაქვს მოლოდინი, რომ წყნარი არჩევნები ჩატარდება. მე ვფიქრობ, ის გეგმები, რომლებიც არსებობს, ვერ იქნება რეალიზებული. ვფიქრობ, ამის ორგანიზატორები რეალობას არიან მოწყვტილები".