ქუთაისის საკრებულოს წევრის, ნანა კოსტავას გადადგომის მოთხოვნით კიდევ ერთი აქცია გაიმართა. ქუთაისის მერიის წინ შეკრებილმა დეპუტატის მხრიდან სიძულვილის ენის გამოყენება გააპროტესტეს და განაცხადეს, რომ კოსტავამ საკრებულო უნდა დატოვოს.

აქციის მონაწილეების თქმით, მათი სურვილი და მოთხოვნაა, საჯარო სივრცეში სიძულვილის ენა არ ისმოდეს და საჯარო მოხელეები მოქალაქეებს ნიშნის მოგებით არ ესაუბრებოდნენ.

"ჩვენ არაერთხელ გვსმენია ნანას მხრიდან ჰომოფობიური, ქსენოფობიური, მიზოგინიური, დამამცირებელი განცხადებები და ძალიან ვწუხვარ, რომ აქამდე მხოლოდ ვიცინოდით ამ ქალის მავნებლურ განცხადებებზე. სწორედ ჩვენმა სიცილმა, ჩვენმა უყურადღებობამ შექმნა ეს ვითარება", — თქვა აქციის ერთ-ერთმა მონაწილემ.

მათ ნანა კოსტავას საკითხზე ქუთაისის საკრებულოს რიგგარეშე სხდომის დანიშვნასაც მოითხოვეს. აქციის მონაწილეებს თან ჰქონდათ პლაკატები: "ნანა წადი", "ნანა კოსტავა საკრებულოს სირცხვილია", "ნაკლები ნანა საკრებულოში".

კოსტავამ დღეს განაცხადა, რომ საკრებულოს დატოვება გადაიფიქრა. ამის მიზეზად კი ამომრჩევლის თხოვნა დაასახელა. მან პარასკევს, 31 მაისს განაცხადა, რომ საკრებულოს ორშაბათს დატოვებდა.

ნანა კოსტავამ 30 მაისს Facebook-ზე სოციალური მედიის მენეჯერის, სალომე ბარკერის ვიდეო გააზიარა წარწერით: "კაი დღეში ხარ ახლა, იცინე!" საკრებულოს წევრის მიერ ვიდეოს ამ აღწერით გაზიარება დროში ბარკერის დის გარდაცვალებას დაემთხვა.

მოგვიანებით კოსტავამ ბოდიში მოიხადა. მან ისევ გაიმეორა, რომ სალომე ბარკერის დის გარდაცვალების შესახებ არაფერი იცოდა. თუმცა On.ge-სთან საუბრისას ბარკერზე მან აღნიშნა, რომ "რაღაცნაირად ბოროტი ძალებისგან გადაუხადეს სამაგიერო".

ამ პოსტის შემდეგ ის ქართულმა ოცნებამ ფრაქციის თავმჯდომარეობიდან მოხსნა. თუმცა, ის დეპუტატის მანდატს მაინც ინარჩუნებს. ის ქუთაისის გენდერული თანასწორობის საბჭოდანაც გარიცხეს.

ამავე თემაზე: