ქუთაისში მერიის შენობასთან საპროტესტო აქცია მიმდინარეობს. აქციის მონაწილეები ქართული ოცნების დეპუტატის, ნანა კოსტავას თანამდებობიდან გადადგომას ითხოვენ.

აქციაზე შეკრებილებს თან აქვთ პლაკატები: "ქუთაისის საკრებულო ნანა კოსტავას გარეშე", "გადადგეს ნანა კოსტავა", "ნანა კოსტავა საკრებულოს სირცხვილია". აქციის მონაწილეები ამბობენ, რომ მათთვის მიუღებელია, ქალაქს წარმოადგენდეს ადამიანი, რომელიც სიძულვილის ენას იყენებს.

"როგორც ქუთაისელი, ვარ შერცხვენილი იმ ფაქტით, რაც ნანა კოსტავამ გააკეთა... ქუთაისელები არ შევეგუებით, რომ ჩვენი ქალაქის სახე იყოს ადამიანი, რომელიც იყენებს სიძულვილის ენას", — ამბობს აქციის ერთ-ერთი მონაწილე.

ქუთაისის საკრებულოში ქართული ოცნების დეპუტატმა, ნანა კოსტავამ Facebook-ზე სოციალური მედიის მენეჯერის, სალომე ბარკერის ვიდეო გააზიარა წარწერით: "კაი დღეში ხარ ახლა, იცინე!" საკრებულოს წევრის მიერ ვიდეოს ამ აღწერით გაზიარება დროში ბარკერის დის გარდაცვალებას დაემთხვა.

მოგვიანებით კოსტავამ ბოდიში მოიხადა. მან ისევ გაიმეორა, რომ სალომე ბარკერის დის გარდაცვალების შესახებ არაფერი იცოდა. თუმცა On.ge-სთან საუბრისას ბარკერზე მან აღნიშნა, რომ "რაღაცნაირად ბოროტი ძალებისგან გადაუხადეს სამაგიერო".

ამავე თემაზე: