ევროპული საქართველოს წევრის, სერგი კაპანაძის განცხადებით, სააპელაციო სასამართლოს განაჩენით დადასტურდა ის, რაზეც ხორავას ქუჩის საქმეზე პარლამენტში შექმნილმა საგამოძიებო კომისიამ დასკვნა დადო. ასე გამოეხმაურა ის სააპელაციოს გადაწყვეტილებას, რომელმაც ნაწილობრივ შეცვალა საქალაქო სასამართლოს გადაწყვეტილება და ნაწილობრივ გაიზიარა ბრალდების მხარის პოზიცია.

"მკვლელი არ არის იდენტიფიცირებული და არის თავისუფლებაზე. ამ სასამართლომაც კი, რომელიც სრულად კონტროლდება ხელისუფლების მიერ, არ გაიზიარა ეს აბსურდული და კატასტროფული არგუმენტები, რომლებიც გააჩნდა პროკურატურას პირველ ინსტანციაში და სააპელაციო დონეზე სარჩელის დროს", — თქვა კაპანაძემ.

მისი განცხადებით, პარლამენტში შექმნილი საგამოძიებო კომისიის დასკვნა არის რელევანტური და ამ დასკვნაზე რეაგირება უმოკლეს დროში უნდა მოხდეს.

"წინააღმდეგ შემთხვევაში ჩვენ გვაქვს შემთხვევა, როცა ახალგაზრდა ადამიანის განზრახ მკვლელობაში მონაწილე ადამიანი, რომელმაც სარალიძეს სასიკვდილო ჭრილობა მიაყენა, არის თავისუფლებაზე. ამის შესახებ არის დასკვნა კომისიის მიერ და ეს დაადასტურა მეორე ინსტანციამ", — აღნიშნა კაპანაძემ.

სააპელაციო სასამართლომ დავით სარალიძის ჯგუფურ მკვლელობაში დაუდგენელ პირებთან ერთად გ.ჯ. დამნაშავედ ცნო.

საქალაქო სასამართლოს გადაწყვეტილებით, გ.ჯ. მსჯავრდებული იყო დავით სარალიძის დამამძიმებელ გარემოებაში მკვლელობის მცდელობისთვის და 10 წლითა და 6 თვით თავისუფლების აღკვეთა ჰქონდა შეფარდებული. სააპელაციო სასამართლოს გადაწყვეტილებით, არასრულწლოვანთა მართლმსაჯულების კოდექსის თანახმად, გ.ჯ.-ს სასჯელის სახით განესაზღვრა თავისუფლების აღკვეთა 11 წლითა და 3 თვის ვადით.

რაც შეეხება გ.ბ.-ს, სააპელაციო სასამართლოს გადაწყვეტილებით, გ.ბ.-ს მონაწილეობა არ მიუღია დავით სარალიძის მკვლელობაში. სააპელაციო სასამართლომ ძალაში დატოვა საქალაქო სასამართლოს გადაწყვეტილება ლევან დადუნაშვილის მკვლელობასთან დაკავშირებით და დამნაშავედ ცნო გ.ბ. მას სასჯელი დაუმძიმდა და პატიმრობად 11 წელი და სამი თვე განესაზღვრა.