"ვიღებ თუ არა ამ ბოდიშს, უნდა ვნახო და ინტონაციიდან გამომდინარე გადავწყვეტ", — ასე გამოეხმაურა შინაგან საქმეთა მინისტრი, გიორგი გახარია ნაციონალური მოძრაობის წევრის, დავით კირკიტაძის ბოდიშს პოლიციელების მიმართ. ამავე დროს, მინისტრი კირკიტაძის ბოდიშს პოლიციელების მიესალმება.

დავით კირკიტაძე 17 დეკემბერს ველისციხესთან აქციაზე პოლიციელზე თავდასხმის, ფიზიკური შეურაცხყოფისა და ქონების დაზიანების ბრალდებით დააკავეს და აღკვეთის ღონისძიებად პატიმრობა შეეფარდა. ამ ხნის განმავლობაში კირკიტაძე ბრალს არ აღიარებდა.

საპროცესო შეთანხმების საფუძველზე კირკიტაძე სასამართლო დარბაზიდან დღეს, 31 მაისს გათავისუფლდა. მოსამართლე ნუნუ ნემსიწვერაძემ საპროცესო შეთანხმებისა და დავით კირკიტაძისთვის 2-წლიანი პირობითის განსაზღვრის თაობაზე პროკურატურის შუამდგომლობა დააკმაყოფილა. გარდა ამისა, კირკიტაძემ ბრალი აღიარა და ბოდიში მოიხადა.

"მე ბოდიშს ვუხდი პოლიციელებს, რადგან მათი საქმიანობა ძალიან მნიშვნელოვანია", — თქვა მან.