თბილისის პირველ სამშობიარო კლინიკაში, ოპერაციის შემდგომი გართულებების შედეგად 35 წლის ნინო მუჯირი გარდაიცვალა. გარდაცვლილის ოჯახის წევრები კლინიკის ექიმის პასუხისმგებლობაში მიცემას ითხოვენ.

ერთ-ერთი ოჯახის წევრის განცახდებით, ექიმი, რომელმაც 35 წლის ქალს სამედიცინო მანიპულაცია ჩაუტარა, "ლიცენზია ჩამორთმეული ჰქონდა და "ლევად" იღებდა პაციენტებს".

ოჯახის წევრების ვერსიით, ახალგაზრდა ქალსა და ექიმს შორის მიმოწერიდან დასტურდება, რომ პაციენტმა ექიმს ვირუსული ინფექციის შესახებ გაართხილა და მიუხედავად ამისა, ექიმმა ნარკოზით ოპერაცია გაუკეთა. ოპერაციის შემდეგ, 35 წლის ქალი კომაში ჩავარდა და 6 თვე რეანიმაციაში იმყოფებოდა.

"აქ არ არის შეცდომა. აქ საუბარია სამედიცინო, განზრახ დანაშაულზე! ეს სამედიცინო მანიპულაცია, რომელსაც იკეთებს ქალების 90%, 15 წუთში სრულდება, ერთ საათში სახლში მიდის ადამიანი. ეს მანიპულაცია კი გააკეთა ექიმმა, რომელსაც ჩამორთმეული აქვს ლიცენზია, არ აქვს საერთოდ ნემსის გაკეთების უფლებაც, ის ამ კლინიკაში მუშაობს მენეჯერად. გადაიმალა, ორი დღეა არ არის კაბინეტში.

ჩუმად და "ლევად" იღებდა საღამოს საათებში პაციენტებს. ლიცენზიაც წართმეული აქვს დროებით, ასევე პირობითი აქვს. ეს ერთი დანაშაული. ჩვენ გვაქვს გარდაცვლილის ტელეფონი, სადაც ყველაფერი წერია.

ჩვენ უშუალოდ ნინოს [ნინო მუჯირი] და ეკატერინე გაგუას [ექიმი] შორის მიმოწერა გვაქვს, სადაც ის კონსულტაციას უტარებს. ნინო ეუბნება, რომ ცხელება ჰქონდა, ის კი დანიშნულებას აძლევს, ანტიბიოტიკს უნიშნავს.

12 იანვარს, როდესაც მოვიდა ნინო კონსულტაციაზე, ექიმმა სასწორზე დადო 35 წლის გოგოს სიცოცხლე და ფული. ყველამ ვიცით, რომ ვირუსი როდესაც აქვს ადამიანს, ნარკოზის გაკეთება არ შეიძლება.

ჩანაწერი გვაქვს, სადაც ნინო ამბობს, რომ ვირუსი ჰქონდა, ექიმს უთხრა, რომ ცხელება ჰქონდა და მაინც გაუკეთა [ნარკოზი]. ნინო ასევე წერს: "ალბათ, ნარკოზმა რეაქცია მომცა და ცუდად ვარ, რეანიმაციაში უნდა გადამიყვანონ," — განაცხადა გარდაცვლილის ოჯახის წევრმა “ფორმულასთან” საუბარში.