აშშ-ს პრეზიდენტის, დონალდ ტრამპის მომხრეები ამბობენ, რომ მექსიკის საზღვარზე კედელს აშენებენ. მათივე თქმით, კედლის ასაშენებელი თანხა ინტერნეტკამპანიის დახმარებით შეაგროვებს.

ყოფილმა სამხედრო მოსამსახურემ, ბრაიან კოლფეიჯმა ტვიტერზე მშენებლობის ფოტოები და ვიდეო გაავრცელა. მისივე თქმით, ტრამპის მომხრეებმა კამპანიის ფარგლებში 22 მილიონი დოლარის მოგროვება შეძლეს.

თანხის მოგროვება მას შემდეგ დაიწყო, რაც კონგრესმა პრეზიდენტს კედლისთვის ბიუჯეტის გამოყოფაზე უარი უთხრა. მისი აშენება დონალდ ტრამპის საარჩევნო კამპანიის ერთ-ერთი მთავარი პირობა იყო.

მშენებლობა ხელმძღვანელობს საქველმოქმედო ორგანიზაცია WeBuildtheWall Inc (ჩვენ ავაშენებთ კედელს), რომელიც ბრაიან კოლფეიჯმა 2018 წლის დეკემბერში დააარსა. ორგანიზაციის სამეთვალყურეო საბჭოს თავმჯდომარე დონალდ ტრამპის ყოფილი მრჩეველი სტივ ბენონია.

CNN-თან ინტერვიუში ბენონმა განაცხადა, რომ მათი კედელი უკვე არსებულ 30-კილომეტრიან ორ მონაკვეთს დააკავშირებს ერთმანეთთან. კანზასის შტატის ყოფილი სახელმწიფო მდივანი, კრის კობაჩი, რომელიც ახლა ორგანიზაციის ადვოკატია, ამბობს, რომ კედლის მშენებლობა რვა მილიონი დოლარი დაჯდება. ტრამპის მომხრე ჯეფ ალენი კი აცხადებს, რომ კედელი ნიუ-მექსიკოში მის ნაწილობრივად კუთვნილ ტერიტორიაზე შენდება.

"ეს სუფთად ამერიკული მეთოდია, რომ კონგრესს დავუმტკიცოთ, რომ უსარგებლოა და ამას შევებრძოლებით. ამ კედელს თვითონ ავაშენებთ", — აღნიშნა ალენმა. მისივე თქმით, ის რასისტი არაა, რადგან მისი ცოლი მექსიკელია და შვილიც მექსიკაში ეყოლათ, თუმცა კედლის მშენებლობას ის უსაფრთხოების აუცილებლობით ხსნის.

WeBuildtheWall Inc აცხადებს, რომ ეს სამუშაოების მხოლოდ დასაწყისია. სასაზღვრო სამსახურმა BBC-ს უთხრა, რომ კედლის მშენებლობასთან არანაირი კავშირი არ აქვთ.