დეპუტატების ნაწილი საქართველო-აზერბაიჯანის საზღვრის დემარკაციაზე მომუშავე საბჭოს წევრებისა და მთავრობის წევრების პარლამენტში მისვლას ითხოვს. დეპუტატები დავით გარეჯის საკითხსა და სამონასტრო კომპლექსთან მიმდინარე სამუშაოებზე ამახვილებენ ყურადღებას.

პარლამენტში საბჭოს მისვლასა და პარლამენტის ჩართულობას ითხოვენ კობა ნარჩემაშვილი, ზვიად კვაჭანტირაძე და ემზარ კვიციანი. კვაჭანტირაძე ამბობს, რომ დავით გარეჯის საკითხი საკომიტეტო სხდომაზეც უნდა იქნას განხილული. ლევან გოგიჩაიშვილის თქმით, პარლამენტმა თავისი ფუნქცია უნდა შეასრულოს და საბჭოს ლეგიტიმაცია უნდა გაარკვიოს.

"უნდა გავარკვიოთ რამდენად უნარიანია ეს საბჭო კონკრეტული გადაწყვეტილებები მიიღოს. რამდენად აქტიურები არიან, რა შეუძლიათ, როგორ შეუძლიათ. რა ფუნქცია აქვს პრემიერ-მინისტრს, სად არის პრეზიდენტი, პარლამენტის ფუნქცია სად არის", — განაცხადა გოგიჩაიშვილმა.

დავით გარეჯის უდაბნოს მონასტრამდე მისასვლელი გზა 4-დღიანი ჩაკეტვის შემდეგ გასულ თვეში დროებით გაიხსნა. 23 მაისს ადგილობრივმა, გიდმა ზვიად ანანიაშვილი ფეისბუქზე ფოტოები გაავრცელა, სადაც წერდა, რომ დავით გარეჯში ჩიჩხიტურის მიმართულებით აზერბაიჯანის მხარეს გზა გაჰყავს. ორი დღის შემდეგ საგარეო საქმეთა მინისტრის მოადგილე ლაშა დარსალიამ განაცხადა, რომ აზერბაიჯანული მხარე სამუშაოებს საქართველოს მიერ კონტროლირებად ტერიტორიაზე არ აწარმოებდა.

საქართველო-აზერბაიჯანის საზღვრის დემარკაციასთან დაკავშირებით პირველი შეხვედრა აზერბაიჯანულ მხარესთან 23-24 მაისს გაიმართა. ქართული მხრიდან დელეგაციას ხელმძღვანელობდა საქართველოს საგარეო საქმეთა მინისტრის მოადგილე, საქართველოს სახელმწიფო საზღვრის დელიმიტაციისა და დემარკაციის საკითხებში საქართველოს სპეციალური წარმომადგენელი ლაშა დარსალია, ხოლო აზერბაიჯანის რესპუბლიკის მხრიდან — აზერბაიჯანის რესპუბლიკის საგარეო საქმეთა მინისტრის მოადგილე, აზერბაიჯანის რესპუბლიკის პრეზიდენტის სპეციალური წარმომადგენელი საზღვრისა და კასპიის ზღვის საკითხებში ხალაფ ხალაფოვი.

მხარეები შეთანხმდნენ, რომ ექსპერტებთან შეუთანხმებელი მონაკვეთები ადგილზე ერთად დაათვალიერონ. გარდა ამისა, ისინი აპირებენ, რომ შესაბამისი ნორმატიულ-სამართლებრივი დოკუმენტები და კარტოგრაფიული მასალები შეისწავლონ.