პარლამენტის თავმჯდომარემ, ირაკლი კობახიძემ ჟურნალისტებს უთხრა, რომ იუსტიციის საბჭოს არამოსამართლე წევრი, ანა დოლიძე ბორჯომში სასამართლო რეფორმის შეხვედრაზე სამუშაო პროცესში ჩართული არ ყოფილა. კობახიძის შეფასებას წინ უსწრებდა ანა დოლიძისი განცხადება, რომ "ირაკლი კობახიძის მიერ წარმოდგენილი ცვლილებები ფარსია".

"ბოლო ხუთი სრული დღე დავუთმეთ ამ საკითხის განხილვას, მათ შორის გვქონდა ორი ორდღიანი გასვლითი სამუშაო შეხვედრა. ყველა მხარე იყო ჩართული ამ განხილვებში, გარდა ქალბატონი ანა დოლიძისა. 5 დღიდან მან მხოლოდ ერთი არასრული დღე გაატარა ჩვენთან ერთად და იმ ერთი დღიდან ნახევარი დღე იყო აუზზე. აი, ეს არის რეალობა და აქედან გამომდინარე მის განცხადებებს სერიოზულად ვერ მივიღებ", — აღნიშნა კობახიძემ.

ანა დოლიძემ On.ge-ს უთხრა, რომ სამუშაო ჯგუფის შეხვედრა არის მცდელობა, რომ მოსამართლე ლევან მურუსიძე და ქართველი ხალხი საკონსულტაციოდ დასვან:

"მე, რა თქმა უნდა, ამაში ხელს არ შევუწყობ, მე ლევან მურუსიძესთან საერთო არაფერი მაქვს. არ მგონია ქართველ ხალხს რაიმე საკონსულტაციო ჰქონდეს ლევან მურუსიძესთან".

რაც შეეხება აუზს ანა დოლიძე პასუხობს:

"ჩემთვის გასაგებია, რომ ლერი ხაბელოვისა და ირაკლი სესიაშვილის აუზების ამბების მერე, აუზი არის ძალიან ტრავმული ცნება ირაკლი კობახიძისთვის. შესაბამისად სტრესულ სიტუაციებში აუზი ახსენდება".