რუსთავი 2-ის ინფორმაციით, წყალტუბოში კურიერის გადამღებ ჯგუფს ფიზიკურად გაუსწორდნენ. დაშავებულია ჟურნალისტი ედიშერ მუშკუდიანი და ოპერატორი ბაკურ ჩიხლაძე. მათივე ცნობით, გადამღები ჯგუფი წყალტუბოში იმ გოგოს ოჯახში იმყოფებოდა, რომელიც 7 თვის ჩვილის მკვლელობის ბრალდებით დააკავეს.

"დაკავებულის ახლობლებმა და მეზობლებმა კომენტარის გაკეთებაზე უარი თქვეს, მას შემდეგ კი, როდესაც ედიშერ მუშკუდიანი და ბაკურ ჩიხლაძე ავტომობილში სხდებოდნენ, მათ თავს რამდენიმე ადამიანი დაესხა და ფიზიკურად გაუსწორდა", — აღნიშნავენ ტელევიზიაში.

მათივე ინფორმაციით, ედიშერ მუშკუდიანი და ბაკურ ჩიხლაძე ამ დროისთვის ქუთაისის ევექსის კლინიკაში არიან გადაყვანილი.

"ედიშერ მუშკუდიანს მრავლობითი მოტეხილობები და თვალის კაკლის დაჟეჟილობა აღენიშნება. ექიმების თქმით, მიმდინარეობს მდგომარეობის შეფასება/დაკვირვება დინამიკაში. სწორედ დაკვირვების შედეგად იქნება მიღებული გადაწყვეტილება მის თბილისში ჰოსპიტალიზაციასთან დაკავშირებით", — ამბობენ რუსთავი 2-ში.

ტელეკომპანიის ცნობით, ოპერატორმა თავდასხმის ამსახველი ვიდეომასალის გადაღება შეძლო. კადრები შინაგან საქმეთა სამინისტროში მტკიცებულების სახით არის წარდგენილი.

შინაგან საქმეთა სამინისტროში On.ge-ს უთხრეს, რომ გამოძიება სისხლის სამართლის კოდექსის 126¹ მუხლის პირველი ნაწილით და 154-ე მუხლის მეორე ნაწილით მიმდინარეობს. მათივე ინფორმაციით, დადგენილია ერთი პირი, რომელიც პოლიციაშია გადაყვანილი.