გაერთიანებული ოპოზიციის ზუგდიდის მერობის კანდიდატი, სანდრა რულოვსი ამბობს, რომ თუ მმართველი გუნდი თავს პირველ ტურში გამარჯვებულად გამოაცხადებს, მთელი ქვეყნის მასშტაბით პროტესტს მიიღებს.

"თუ ისინი მაინც პირველ ტურს გამოაცხადებენ, ვისაც უნდა გამომყვეს მთელ საქართველოში, ეს არ არის ზუგდიდის ამბავი, სოფელ-სოფელში, როგორც ზვიად გამსახურდია დადიოდა რეფერენდუმის დროს, მეც მზად ვარ ამ ქვეყნისთვის, ამ ნაბიჯის გადადგმისთვის და თითო სოფელში, თუ მე არ გამომყვებიან თბილისამდე, იმ შუშის სასახლემდე. არ გირჩევთ, პირველი ტური გამარჯვებულად გამოცხადოთ. მე ამისთვის ვარ მზად, რა ფასადაც არ უნდა დამიჯდეს, თქვენ მე არ მიცნობთ", — თქვა რულოვსმა.

სანდრა რულოვსის პოზიციას იზიარებს მისი ქმარიც, საქართველოს მესამე პრეზიდენტი, მიხეილ სააკაშვილი. 18 უბნის მონაცემებით, ზუგდიდში ქართული ოცნების მერობის კანდიდატი, გეგა შენგელია იგებს.