აშშ-ს პრეზიდენტის, დონალდ ტრამპის შემოსავალი 2018 წელს 421 მილიონს აღემატება. ამის შესახებ Bloomberg დოკუმენტზე დაყრდნობით წერს, რომელიც სახელმწიფო ეთიკის სამსახურმა გამოაქვეყნა.

დოკუმენტში ზოგიერთ შემოსავალზე კონკრეტული თანხა მითითებული არაა და მხოლოდ დიაპაზონია აღნიშნული. ამის გამო CNN აღნიშნავს, რომ ტრამპის შემოსავალმა 434 მილიონს გადააჭარბა. გარდა ამისა, CNN აღნიშნავს, რომ წინა წელთან შედარებით ტრამპის შემოსავალი შემცირდა. პრეზიდენტმა 2017 წლის დეკლარაციაში მიუთითა, რომ 450 მილიონი დოლარის შემოსავალი მიიღო.

ფინანსური დეკლარაციის მიხედვით, შემოსავლის დიდი ნაწილი აშშ-ს პრეზიდენტმა უძრავი ქონების ობიექტებიდან მიიღო. კერძოდ კურორტმა ფლორიდაში მარ-ა-ლაგომ მას 23 მილიონი დოლარი მოუტანა, ვაშინგტონში სასტუმრო Trump International-მა — 41 მილიონი, გოლფის კურორტმა მაიამიში Trump National Doral-მა — 76 მილიონი.